Dewleta tirke 29ê teşrîna verêne de 9 rojnamegerê kurdî tepiştbî. Nînan ra muxabîra JINNEWSî Habîbe Eren derheqê prosesê destbendkerdiş û tepiştişî de qisey kerd û pare kerd ke polîsan aye, Selman Guleryuz û Oznure Deger rê îşkence kerdo û pê kiştişî rojnamegerî tehdît kerdê.

Habîbe Eren da zanayene ke polîsan 15 saetan ê rayîr a berdê, nêverdayo ke kelemçeyê înan bêrê vetene û ameyê berdene bi TEMê Anqara. Habîbe Eren vat: ''Roja diyîne ya nezaretî de polîsan ma erdî de derg kerdî, erd de kaş kerdî. Ma waşt ke raporê derbkerdişî bigêrê la polîsan nêverda. Reyna ma ameyî berdene bi TEMî. Oznure vat ke polîsan a pê kiştişî tehdît kerde. Roja îfadeyê dozgerîye de polîsan reyna ma pey ra kelemçe kerdî ke medyaya îqtîdarî rê mîzansenêk pêşkêş bikerê. Artêşêka polîsan ma berdî. Polîsan edlîye de bi zorî pê ma  îfade da îmzakerdene. Heta serê sibayî ma îfade da la hakîman mehkeme de 10-15 deqayan de ma tepiştî. Wexto ke ma mehkeme ra vejîyayêne sloganî vatî û polîsan reyna ma derb kerdî.

Serê sibayî saete 05.00 de ma ameyî berdene bi Zîndanê Sîncanî. Ma uca de raştê cigêrayîşê rûtî ameyî. Koxûşêk de 5 rojan qet yew hewcedarîye nêdîyaye ma. 5 rojan ra dima ancax hewcedarîyê ma qismêk dîyayî. Ma hema zî seba hewcedarîyan israr kenê.''