Vizêr operasyonê qirkerdişê sîyasîyî yê vera medyaya kurdan de 12 rojnamegerî ameyî destbendkerdene. Nînan ra Dîrene Yurtsever û Bêrîvanê Altan da pêhesnayene ke ê wextê destbendkerdişî de raştê îşkenceyê polîsan ameyî.

Bado ke qedexeyê pêvînayîşê avûkatan ame wedaritene avûkatan Mudirîya Asayîşî ya Anqara de rojnamegeran reyde pêvînayîş kerd.

Muxabîra Ajansê Mezopotamya Bêrîvane Altan pêvînayîş de semedê paştdayîşê ke dîyayo ci her kesî spas kerd. Altane ard ziwan ke a keye de raştê kelemçeyanê peykîyan û îşkenceyî ameye û vat: ''Polîsan wextê destbendkerdişî plan kerdbi. Polîsî xeylêk verê berî de mendê û dima ra înan ra yeleqî ameyî ardene. Polîsan vat 'ma do milê to çewt bikerê, ma rê zorîye mevejê.' La mi no qebul nêkerd înan pê zorî kerd ke sareyê bîyarî war.  Gama ke ma rayîr de şiyênî polîsan rê telefon ame û înan ra dîmenî ameyî waştene.''

Mudira Karanê Nuştuşî ya Ajansê Mezopotamya Dîrene Yurtsever zî da zanayene ke polîsan waşt pê zorî mîyanê beyraqanê tirkan de destê ci kelemçekerde fotografanê ci vejê û aye rê nengî çînayî û, tehdît kerda. Yurtsevere ard ziwan ke wesayît de hetê polîsan ra raştê nenganê cînsî û tehdîdan ameye û nêweşxane û mehla de hetê polîsan ra sey terosîtî ameye hedefmojnayene.