29ê teşrîna verêne de new muxabîr û rojnamegerê JINNEWS û Ajansê Mezopotamya ameybî tepiştene.

Nînan ra Denîz Nazlim, Selman Guleryuz û Emrullah Acarî zîndanî ra bi rayîrê avûkatanê xo mesajî şawitî. Mesajê rojnamegeran wina yê:

Emrullah Acar: Ma 9 rojnamegeran seba ke raştîyî nuştêne ameyî tepiştene. La ma do zîndan de zî raştîyan binusê. Mi verî zîndanan ser o zaf xeberî viraştbî. Nika ez eşkena nêzdî ra rewşe bivîna û zîndanî ser o binusa. Ma do binpaykerdişanê heqan bi rayîrê çapemenîya azade biresnê.

Selman Guleryuz: Ma nêzdî ra şahidê ci yê ke îqtîdarê Tirkîya vera xoverdayîşê çapemenîya azade mîzansenêkî keno. Mekan ma rê ferq nêkeno. Ma do kamcade benê wa bibê raştîyan binusê. Biciwîya çapemenîya azade.

Denîz Nazlim: Tirkîya de rojnamegerîye karêko zehmet o. Ma seba ke şagirtê çapemenîya azade yê ameyî sûcdarkerdene. Ma rojnameger ê, karê ma rojnamegerîye ya. Ma zere de embazê ma zî teber de tradîsyonê çapemenîya azade reyna do bîyarê ca û tim raştîye bipawê.