9 rojnameger û muxabîrê Ajansê Mezopotamya û JINNEWSî 29ê teşrîna verêne de bi îdîaya 'endamîya rêxistine' tepişîyabî û erşawîyabî Zîndanê Sîncanî.

Nînan ra Mudira Karanê Nuşteyan a MA Dîrene Yurtsever, muxabîre Bêrîvane Altan û Ceylane Şahînlî, muxabîrê JINNEWSî Habîbe Eren û Oznure Deger Zîndanê Cinîyan ê Girewteyî yê Sîncanî de tepişîyenê.

Rojnamegeranê cinîyan bi rayîrê avûkatanê xo zîndanî ra nê mesajî şawitî:

Bêrîvane Altan: Armancê înan bêvengkerdişê rojnamegeran û çapemenîya azade yo. La çapemenîya azade nêna bêvengkerdene. Ma do tradîsyonê çapemenîya azade rê dewam bikerê.

Oznure Deger: Çapemenîya azade do vera teda, kiştiş û tepiştişî nuştişê raştîyan rê do dewam bikera. Ma teqîbkerdoxê Gurbetellîye Ersoz ê, zîndanî do nêeşkê qelema ma bigêrê û çapemenîya azade do bêveng nêmana.

Ceylane Şahînlî: No ca do nêeşko bikero ke ma rojnamegerîye mekerê. Ma sey şagirtanê Apê Musayî do dewam bikerê.

Dîrene Yurtsever: Ma seba ke rojnameger ê ameyî tepiştene. Ma wazenê wa her kes wayîrê rojnamegeran vejîyo. Ma sereyê xo nêard war û do nêarê war. Ma raştîyan de israr kenê. Ma ça de benê wa bibê nuştişî rê do dewam bikerê.

Habîbe Eren: Ma nê karî de şahidîya zaf çî kerde, ma dî ke polîsanê îşkencekeran ma rê zî îşkence kerdî. Ma sey rojnamegeran ê cinîyan binê her şertî de seba komel û rojnamegerî raştîyan binusê. Ma do rojanê azadan de yewbînan bivînê.