29ê teşrîna peyêne de Mudira Karanê Nuşteyî ya Ajansê Mezopotamya (MA) Dîrene Yurtsever, muxabîrê MA Bêrîvane Altan û Ceylan Şahînlî û muxabîrê JINNEWSî Habîbe Eren û Oznure Deger ameybî tepiştene.

Dima ke menga înan a zîndanî debîye panc cinîyan ê tepişteyan Zîndanê Sîncanî ra mesajî şawitî. Mesaj de ame vîrvistene ke  ''29ê teşrîna peyêne de serra 99. ya Komara Tirkîya de serê sibayî 9 rojnamegerî tepişîyayê.''

Mesajê rojnamegeran ê cinîyan ê tepişteyan wina yê:

Habîbe Eren: ''Her çax rojnamegerê kurdî raştê teda ameyî. Nê tedayî têna yew beş eledar nêkenê û pê îtîrazê beşêkî nêqedîyenê. Coka ganî pêro beşê komelî verî ke erey bo vengê xo berz bikerê.''

Dîrene Yurtsever: ''Ma tim rojnamegerî kerde. Ma sey teqîbkeranê çapemenîya azadîye vanê ke qetî do apey gamêke meerzê, bîyad nêkerê, çapemenîya azade bipawê û seba ney têkoşîn bikerê. Pawitişê çapemenîya azade mesuldarîyêk û tewirêko raşt o.''

Ceylane Şahîn pare kerd ke tepişîyayîşê înan ra dima amîrê TEMî kêfweşî ra bi qîrayîşî bermayo û vat: ''Têna no mîzansenê tepişîyayîşê ma eşkera keno. No kîn û hêrsî vera nasnameyê ma yê rojnamegerî û nasnameyê ma yê kurdayetî yê. Ê vanê qey zîndan de ma bêveng bikerê. La ma tradîsyonê çapemenîya azade ra yenê û qetî bêveng nêbê.''

Bêrîvane Altan: ''Mi sey cinî û rojnamegerêka kurde wextê destbendkerdişî de rixmê teda zî sereyê xo nêard war. Ê raştê nê şaro ke sereyê xo nêano war de têrî mendî. Ma do vera tedayan tim gureyê xo bikerê. Ê do nêeşkê pê dekerdişê zîndanî qelema ma destî ra bigêrê.''

Oznure Deger vat: ''Îqtîdar mîyanê tengîye de yo û keno ke vengê çapemenîye bibirno. 25ê teşrîna verêne de asayîşê TEMî pê destbendkerdişê ma mîzansenêk kay kerd. La ma bi sloganê xo 'Çapemenîya azade bêveng nêmana' mîzansenê înan pûç kerd. Ma do tim raştîyan binusê. Ma do wayîrê mîrasê Çapemenîya Azade ya Gurbetellîye Ersoz û Apê Musayan vejîyê.''