Muxabîrê tepişteyî yê Ajansê Xeberan ê Dîcle-Firatî (DÎHA)yo ke pê KHKyan amebi qefilnayene Nedîm Turfentî derheqê binpaykerdişanê heqanê tepişteyan de Komeleya Rojnamageran a Dîcle-Firarî (DFG) rê mektubêke şawite.

Turfentî da zanayene ke 5 serrî yo tepişte yo û vat: ''Bi bahaneya janî îzolasyonêko tûj dîya destpêkerdene. Ma vatêne qey derzîna janî ra dima normalîze do dest pêbikera la aktîvîteyê sosyo-kulturelî, kursî û xoşeberî yenê astengkerdene.''

Turfentî derheqê prosesê muhakemekerdişê xo de vat: ''Pêro şahîdan mehkeme de eşkera kerd ke îfadeyê mi binê îşkenceyî de gêrîyayo. Îfadeyî pûç bîyî nika dosya de têna vilakerdişê medyaya dîjîtale estê. Ez rayêke zî nêvejîyaye verê mehkeme.

Mi muracatê Mehkemeya Heqanê Merdiman a Ewropa kerd la hema zî dosyaya mi nêameye dîyene. Dezgehê rojnamegerîye eşkîyayêne rolêkê aktîfî bigêrê xo ser. Wexto ke Îstanbul de rojnamegerî tepişîyenê no beno rojdem la wexto ke herême de tepişîyenê rojdem nêbeno.''