Paytextê Fransa Paris de komêka ciwanan Meydanê Republique de serrgêra ronayîşê PKKyî bi pankarta 'Serrgêra 43. ya PKKyî' fîraz kerde. Ciwanan fîşekê hewayî eştî, sloganê sey 'PKK şar o, şar tîya de yo' vatî.

Kurdîstanijan şaristanê Rennesî yê Fransa de şayîya ronayîşî kerde. Şayîye de çarçewa kampanyaya 'PKK şar o, şar nêno qedexekerdene' îmzayî zî arê dîyayî. Şayîye de hunermend Mîr Perwer, Zarîfe, Şiyar û Dijwar û Koma Brotanya Child Saz vejîyayî sehne ser.

Şaristanê Baselî yê Swîsre de aktîvîstanê Têgêrayîşê Ciwanan ê Şorişgêran (TCŞ) û Cinîyan ê Ciwanan ê Têkoşeran (TÊKO-JIN) pê meşaleyan çarçewa Hemleya 'Werin Cenga Azadiyê' de çalakîya rayraşîyayîşî kerde, fîşekê hewayî eştî û flamaya PKKyî kiriştî.

Kampa Lavrioyî ya şaristanê Atina ya Yunanîstanî de kurdan bi coşî şayîyêke kerde. Şayîye de govende ameye girewtene, fîşekê hewayî erzîyayî, mesajî ameyî wendene. Şayîye de Koroyê Domanan ê Lavrioyî, Gruba Dansî ya Domanan a Lavrioyî vejîya sehne ser.

Şaristanê Heilbronnî yê Almanya de Merkezê Komelê Demokratîkî yê Kurdan de şayîye de verî sîyastmedaran Faysal Sariyildiz û Abdullah Demîrbaş qisey kerd. Dima derheqê tarîxê têkoşînê PKKyî de sînevîzyonêk ame mojnayene. Şayîye pê deyîran û govendan qedîyaye.

Şaristanê Limassolî yê Qibrisî de Merkezê Kulturê Kurdan ê Theofilosî de salona şayîya ronayîşî pê posteranê Rayberê Şarê Kurdî Abdullah Ocalanî û flamayê PKK, KCK û PAJKî xemilîyaye. Şayîye de venga pêro ciwanan dîya ke tewrê 'Werin Cenga Azadiyê' bibê. Şayîye de Koroyê Domanan ê Theofilosî vejîya sehne ser, govende ameye girewtene û sloganê sey 'Biciwîyo Serek Apo' û 'Biciwîyo xoverdayîşê PKKyî' ameyî vatene.
 

Şaristanê Londonî yê Îngilîstanî de Merkezê Komelê Demokratîkî yê Kurdan de şayîyêke ameye kerdene. Şayîye de cinîyan kincê tradîsyonelî dayî xo rê. Şayîye de beşdaran pîya deyîra 'Ma PKK yê' vate. Şayîye de Koroyê Domanan, endamê Koma Çarnewa Serhat, Mem Şevder û hunermendê herêmî vejîyayî sehne ser. Şayîye pê govende qedîyaye.

Şaristanê Melbournî yê Avusturalya de şayîye de kurdan pê deyîran govende girewte, derheqê girîngîya roje de mesajî dîyayî. Şayîye de Ekîpa Govende ya Domanan vejîyaye sehne ser.

Dewa Platinovke ya herêma Krasnadarî ya Rûsya de serrgêra ronayîşê PKKyî de ciwanan verî eşkerayîyêke daye. Dima ciwanan deyîrî vatî û govende girewte.