Derheqê Vervatoxa Demkî ya Têgêrayîşê Cinîyan ê Azadan (TJA) Ayşe Gokkan de pê bahaneya 'îdare û endamîya rêxistine' dewa amebî akerdene. Roniştişo 22. yê dewa Mehkemeya Cezaya Girane ya Amedî de amebi kerdene. Gokkane, avûkatê ci û xeylêk dezgehê cinîyan tewrê roniştişî bîyî.

Gokkane vera îdîayan kurdkî qisey kerd û seba ke 7 aşme yo  bêxopawitişî zîndan de nêrazîbîyayîş mojna. Gokkane vat avûkatanê ci îdîaname ardo zîndan la îdareyê zîndanî aye nêdayo. Gokkane seba destûr nêdîya tewrê cenazaya dayîke xo bibo zî hersê xo ard ziwan û vat no zulm o.

Wextê roniştişî de serekê mehkeme mudaxeleyê avûkatan kerd, înan rê gef wend û vat: ''Tîya de vateyê mi derbaz beno. Hedê xo bizanê.''

Serekê Baroyê Amedî Nahît Erenî û endamê Heyetê Rayberdişî yê Baroyî mehkeme reyde pêvînayîş kerd la serekê mehkeme pare kerd ke ê do înan goşdarî mekê. Serekê mehkeme waşt polîsî avûkatan bi zorî vejê teber. Wexto ke avûkatan vera ney nêrazîbîyayîşê xo mojna, polîsan da înan ro û ê salone ra vetî.

Wextê roniştişî de polîsan waşt ke birayê Gokkane Vedat Gokkan destbend bikerê la seyrkerdoxan nêverda. Waya Ayşe Gokkan Mihrîcane Gokkan zî xo ra şîye û wedarîyaye nêweşxane.

Avûkatê Gokkane Muharrem Şahînî seba ke têmîyankewtiş vejîya waşt wa roniştiş bêro peyde eştene la waştişê ey ame redkerdene. Mehkeme qerarê dewamê tepiştişê Gokkane da û roniştişo bîn 13ê teşrîna verêne re peyde eşt.

Hetê bînî ra Baroyê Amedî bi eşkerayîyêke da zanayene ke roniştişê Ayşe Gokkane de avûkatî raştê hêriş û heqaretî ameyî û vat ê do nê çirey qebul nêkerê û milê xo çewt nêkerê.