Hemserekê Pêroyî yê PYDyî derheqê Operasyonê Xurtkerdişê Asayîşî de ANFyî rê qisey kerd û tay agahîyî dayî.  

Salih Muslimî vist vîrî ke Operasyonê Xurtkerdişê Asayîşî waştişê serekanê eşîran, şêxan û şarê Dêra Zorê ser o hetê QSDyî ra dîyayo destpêkerdene. Salih Muslimî vat: ''Heyf ke tay endamanê Meclîsê Leşkerî yê Dêra Zorê ser o zî gerreyî est bîyî. Operasyonî hêverî reya nê kesan ame kerdene. Nê kesî tepişîyayî û ê kesê bînî ke nînan de têkilîye kerdêne zî tepişîyayî. Nê kesan şebekeyanê sûcan de û sey DAÎŞî cergan de şirîkîye kerdêne. Nê şebekeyan sere wedarit û îdîa kerd ke QSD zorbazîya înan keno. Şarê Dêra Zorê nê şebekeyan û sûcanê înan ê narkotîk û cînayetan nêwazeno. 

QSDyî roja hîrêyîne de tay kesê bînî tepiştî. Nê kesan îtîraf kerd ke dewleta tirke no serewedaritiş organîze kerdo. Xora dewleta tirke hema roja diyîne ya operasyonî de hêrişê Til Temir, Minbic û cayanê bînan dayî destpêkerdene. Tay qeydê vengî vejîyayî werte. Nê qeydan de dewleta tirke cergan rê soz dana ke do Dêra Zorê de paştî bida înan. Dewleta tirke û rejîmê Sûrîye kenê ke şarî bikewê pê.''

Salih Muslîmî bale ante ser ke dewleta tirke destpêkî ra nata kena ke Îdareyê Xoserî çin bikera û destkewteyanê kurdan çin bikera. Muslimî vat: ''Dêra Zorê seba ma cayêko girîng o. Çunke cûya ver Dêra Zorê merkezê DAÎŞî bîya. Ma do nêverdê ke DAÎŞ reyna Dêra Zorê de serdestîya xo awan bikero. Seba ney zî ma şarî reyde xebitîyenê û kenê ke asayîşê Dêra Zorê bîyarê ca. Ganî Dêra Zorê, Reqa û cayê bînî nêkewê destê DAÎŞî. Serekê eşîran zî paştî danê ma. Tay serekê eşîran hetê îşxalkerdan de cagênê û seba menfaetanê xo zî têgêrenê. Şar pabesteyê Îdareyê Xoserî yo. 

Şarê Dêra Zorê tim hetê QSDyî de û Îdareyê Xoserî de yo. No şar pê provakasyonan mexapîyo. Dewleta tirke wina mojnena ke çew vano qey mabênê kurdan û ereban de şer est o û erebî QSDyî qebul nêkenê. La çîyo winayên çin o. Mîyanê QSDyî de erebî zaf ê.  Tîya de sîstemê ma sîstemê neteweya demokratîke yo ke bingeyê ci de wayûbiratîya şaran est o. Ma şarê xo destpêk de rêxistin kerd, bi hêzî kerd û bi nê hawayî zî şarî xopawitişê xo awan kerd. Ewro tay meseleyê winayênî hema zî qewimîyenê. Yanî kêmasîyê ma est ê. Ganî ma hîna zaf kede bidê û xîret bikerê.

Ma kenê ke ferasetê komelî bivurnê. Mîsal sîstemê ma de cayê cinîyan vurîya û cinîyî îdare de erkî kenê. Ewro tewr zaf cinîyê erebî tewrê sîstemê ma benê. Çunke tewr zaf cinîyê erebî raştê teda ameyê. Meseleya ferasetî wext, pratîk û duristîye wazena. Ewro şarê Dêra Zorê qala menfaetan ney qala prensîban keno. Yanî netîce gêrîyaya la ganî hîna zaf xîret bêro kerdene.''