Vera xespkerdişê şaredarîyanê Mêrdîn, Êlih û Xelfetî çalakîyê protestoyî dewam kenê. Bin şewe de Qoserê Mêrdînî de rayraşîyayîşo meşaleyin ame kerdene. Bi vengdayîşê DEM Partî şaro ke serê rayîrê Dêrik- Qoserî de ame têhet bi tafînayîşê meşaleyan û vatişê sloganan dest pê rayraşîyayîşî kerd. Wekîla DEM Partî Saliha Aydeniz û Hemşaredara Bajarê Pîlî yê Mêrdînî Devrîme Demir zî tewrê rayrşîyayîşî bîyî. Rayraşîyayîş de sloganê sey “Bijî Serok Apo”, “Dîsa dîsa serhildan Serokê me Öcalan”, “Jin jiyan azadî” ameyî vatene.

Badê rayraşîyayîşê Meydanê Dêrikî de verî Hemşaredare Devrime Demir xîtabê şarî kerd. Demire bale ante xoverdayîşê şarê kurdî yê vera hêrişan ser û vat: ''Rixmo ke bi serran dewî û keyeyê kurdan ameyî vêşnayene înan xover da û bi têkoşînê xo ewro eşkenê xo îdare bikerê. Bi polîtîkaya newî, bi îdareyê neweyî yeno waştene ke îradeyê kurdan bêro destsernayene. La wa hole bizanê ke no şar verê înan de do çirey milê xo çewt nêkero. Şarê ma qerardar o, ma qerardar ê. Eke ê ma nêşinasnenê ma zî înan nêşinasnenê. Ma îradeyê şarê xo yê. Şarê ma paştî dano ma. Polîtîkaya ke ma înkar kena, ma nêşinasnenê.''

Wekîle Saliha Aydeniz zî nê vatî: ''Şima 3 ney 300 reyî zî qeyûmî tîya ca bikerî şarê ma şima nêşinasneno.  Coka na polîtîka caverdê. Şima verî zî qeyûm tayîn kerd. Şarê kurdî sindoqan de cewabê şima da. Şarê kurdî tim dersê şima dano la şima reyna ders nêgenê.  Ewro şima reyna wazenê polîtîkaya dişmenîye rayra bêrê. Ma zanê ke şima kewtî tengayî, ma zanê ke şima bêçare yê. No rayîr, rayîr nîyo.No rayîrê tesfîye yo. No rayîr azadîye werte ra wedareno. Şima îradeyê şarê kurdî nêşinasnenê û qeyûm tayîn kenê.

Tirkîya bi darbeyan yena îdarekerdene. Heta AKPyî bi darbeyanê leşkerîyan, bi AKP-MHP zî bi darbeyanê sîyasîyan yena îdarekerdene. Peynîya şima bîya nizdî. Şima ewro wazenê Rojhelatê Mîyanênî de bibê wayîrê qale. La şima ganî bizanê ke semedê destfînayîşê nê rolî ganî meseleya kurdan bi metodanê demokratîkan bêra çareserkerdene. Eke şima wazenê Rojhelatê Mîyanênî de bibê  wayîrê warêkî, şima ganî meseleya kurdan bi hewayêkê demokratîkî çareser bikerî. 

Rayîrê nê zî Rayber Şarê Kurdî yo. Muxatê nê Rayberê Şarê Kurdî Birêz Abdullah Ocalan o. Ma nê eşkera vanê. Hetêkî ra qala çareserîye kenê hetê bînî ra qeyûm tayîn kenê. Na dirîtîye ya.  Bi xespkerdişê îradeyî demokrasîya Tirkîya yena tesfîyekerdene. Eke şima ewro wazenê kurdan reyde haştîye bikerî, rayîrê nê Îmrali yo, şirê Îmrali.''