Meclîsê Partîye yê HDPyî seba ke polîtîka û xerîtaya xo ya dewrê neweyî dîyar bikero Merkezê Pêroyî yê HDPyî kom bi. Hemserekê Pêroyî yê HDPyî Mîthat Sancarî destpêkê kombîyayîşî de qisey kerd û serebûtê peyênî ercnayî.

Sancarî destpêkê qiseykerdişê xo de qala nîqaşanê serê HDPyî kerde û vat: ''Metodê îqtîdarî yê nefret û cîyakerîye nê welatî de bi sebebê rijîyayîşî. Êyê ke partîya ma ser o qisey kenê û nîqaşan kenê wa verî biewnê xo ra. HDP pê paştdayîşê şarî hê têkoşînê xo keno. Ma bedelê giranî dayî û resayî nê rojan. Provakasyon û tahrîkî nêeşkenê ma rayîrê ma ra dûrî bivisnê. Rayîrê ma rayîrê çareserîya demokratîke ya meseleya kurdan o. Seba ke weçînayîşî verê ma de yê, pozîsyonê HDPyî rojdemê her kesî de yo. Her kes zaneno ke partîya ma çendek girîng a.

Ma do weçînayîşan de sîstemê zûran, talan û gonîye birijnê. Ma reyna seba muzakereyanê weçînîyayîşê Serekkomarîye veng danê. La muxetabê nê vengdayîşî şarê Tirkîya yê, pêro komel o. Êyê ke wazenê HDP bin bikewê şar do înan bişeqiznê. Ma verê şarî de bi mesuldarîya xo têgêrenê. No îqtîdar zulmê şarî keno. Şarê kurdî do hişmendîya îqtîdarî ya ke esteyanê domananê înan tewreyan de dana destê keyeyan, efû nêkero. Ma wazenê nê welatî doşegê merdeyanê bêgoran ra bivurnê bikerê aram. Şarê kurdî û HDP do verê îqtîdarî de çok nêşorê erdî ro. Tewirê embaza ma Semra Guzel tewirê pêro şarê kurdî yo.''