HDPyî Mersîn de bi nameyê 'Venga seba demokrasî mîtîngêk kerd. Mîtîng kişta Stadyumê Tevfîk Sirri Gurî de ame kerdene.

Şar kontrolê GBTyî ra dima derbazê warê mîtîngî bi û deyîran reyde govende girewte. Mîtîng de sloganê sey 'Biciwîyo Serek Apo', 'Biciwîyo xoverdayîşê zîndanan' û 'Cinîye, Cuye, Azadîye' ameyî vatene.

Hemserekê Pêroyî yê HDPyî Mîthat Sancarî mîtîng de qisey kerd û vat: ''Ma zanenê ke wexto ke nê coşî vîneno Qesre pê tersî recifîyena. HDP do îqtîdarî çin bikero, sîstemê ci xera bikero. Îqtîdar ganî cade nika îstîfa bikero.

Ganî bira weçînayîşê verwextî bêra girewtene. Şar do sindoqan de cewabê Erdoganî bido. Wa Erogan bêro şarî ra cewabê xo bigêro. Seke zanîyeno ma her hele amde yê. Ma têkoşînî her keye, taxe, kuçe û warî de pîl kenê.

HDP keyeyê şaran o, îradeyo yewbîyaye yê şaran o, garantîya ameyoxî ya. Ma nê sîstemê xirabî bivurnê. Têna ma eşkenê nê sîstemê zulm, kolonyalîzmî û otorîterî bibvurnê. Ma wayîrê a qerardarî yê.''