Hemserekê camêrdî yê HDPyî yê şaristanan Anqara de kom bîyî. Kombîyayîş de verî Hemserekê Pêroyî yê HDPyî Mîthat Sancarî qisey kerd.

Qiseykerdişê Sancarî ra tay noqtayî wina yê:

''Na serre do biba serra fînale. Coka mesuldarîyêka pîle kewena milê her kesî. Ma par nê pêrar kongre de vatbi 'Xoverdayîşî ra dima, karê ma karê awankerdişî yo.' Nika zî wext wextê awankerdişî yo. Ma do pîya sîstemê xo awan bikerê û bi nê sîstemî edalet, haştîye û azadîye bîyarê nê welatî.  Ma do herêmanê xo de awankerdişê nê sîstemî bidê destpêkerdene. Eke şar xo îdare bikero ma eşkenê hînî qala demokrasî bikerê.

Ma wazenê çarçewa Îtîfaqê Demokrasî de demokrasîyêka xurte awan bikerê û nê esasî ser o haştîye bîyarê ca. Gama verêne ya girînge zî demokrasîya herêmî ya.  Senî ke têkoşîno herêmî hêzo bingeyî yê Îtîfaqê Demokrasî yo, demokrasîya herêmîye zî zerrîya demokrarîya averşîyaye ya.  Îqtîdar nika seba awankerdişê faşîzmî destê ci ra çita bêro keno. Vera ney alternatîfo tewr hol demokrasîya herêmî ya.  Vera xîretê awankerdişê faşîzmî alternatîfo tewr xurt HDP yo. Rayîro Hîrêyîn do sîstemêkê demokratîkî awan bikero, haştîye, edaletî û azadîye bîyaro nê welatî. Rayîro hîrêyîn rayîrê xelisîyayîşî yo.

Nika Tirkîya de krîzo ekonomîk beno giranêr, tecrîdê Îmraliyî yeno xorinkerdene, definkerdişê cenazayan rê tehamul nêno kerdene.  Her cade serdestîya teda est a. Tepişte Mehmet Sevînç rixmê nêweşîyanê xo vera nêdîya û zîndan de dinyaya xo bedilnaye. Embaze Aysele Tugluk zî nêweşêka giran a û nêeşkena zîndan de bimana la vera nêdîyena. Îqtîdar bi nê kerdişî cezaya îdamî ano ca.  

Ê do nêeşkê pê dewayan û tedayan verê HDPyî bigêrê. Coşê 8ê Adare û Newroze xora mesajê xo dayî. Şar wayîrê HDPyî vejîya. Ma do îqtîdarî çin bikerê û welatî bivurnê.  Ma do weçînayîş de stratejîya xo têkoşînê hemparî û îtîfaqê demokrasî ser o ronê.''