Hemserekê Partîya Demokratîke ya Şaran (HDP) kombîyayîşê grube yê partîya xo yê  hewtane de qisey kerd.

Sancarî nê vat: ''Rixmê heme hêrişanê îqtîdarî yê vera kurdan, kurdî sereberz xovar danê. Hêvî qerardar rayraşîyayîşê xo rê dewam kena.  Îqtîdar rijîyeno, verbi çînbîyayîşî şino. Ma bi serran o vanê ke no îqtîdaro ke zûr û şerî ser o ameyo ronayene do birijîyo û nika peynîya ci nizdî biya. HDP sey serkêşê heqîqetî rayraşîyayîşê xo rê dewam keno. Bedelê nê rayraşîyayşî şarê kurdî dano. HDP do rayîrê xo ra peyser game meerzo. Heme îqtîdarê ke bi şer, înkar û zulmî ameyî ronayene rijîyayî. Kurdê ke verbi roşnayîyê rayra şine do înan îqîdarî ra bidê war.

Îqtîdaro ke musayê zûran o derheqê pandemî de zî şarî xapîneno hûmara raşt nêvano. Tirkîya lîsteyê dinya de nişka 24î ra vejîyayî rêzê 3ine. Faturayê zûranê hukmatî weşîya şarî ya. Tedbîrê hukmatî yê vera  pandemî de têna qedexeyî estê, paştdayîş û hetkarîye çîn a.

Şar neçar o tengayî anceno. Îqtîdar butçeyî şerî rê xerc keno. Esnafê ke pandemî ra zirar dîyo bermeno. Mehlimê ke tayînê înan nêvejîyayî tengayî ancenê. Reyna meseleya derzînê pandemî ke do rojanê verê ma de bikewo rojdemê ma. Nê heme û semedê xeylêk babetanê bînan ê muhîman  ma butçe waşt înan red kerd. No îqtîdar têna şaredarîyan de qeyûm ca nêkeno. Çimeyanê welatî roşeno. Ma do hesabê nê hemeyan bipersê.

Welat de neçarîye, vêşanîye esta, la vera nayî têkoşîn esto. Şer esto, talan esto û la raywanê demokrasî û haştîye zî estê. Merdîn, Qoser û Nisêbîn de ma game bi game teqîp kerdî. Xeylêk kamarayan ma antêne ma zanê ke ê çapemenîye nêbî. Mi waştêne ke şima nê dimenan vînê. Qoser de cinîyan ke zanayêne polîs înan ancenê vera kamerayanê înan tîlîlî antêne. Şarê ma verê çimanê înan de qerardar rayra şiyêne. Rayraşîyayîşê azadîye dewam keno ke peynîya ci roşnayîya. Ma do miheqeq ser bikewê.''