Rêxistina HDPyî bi şîarê Nika wextê edaletî yo banê partîye de têhetameyîşê şarî organîze kerd. Hemserekê Pêroyî yê HDPyî Mîthat Sancar, Hemserekê Pêroyî yê KCDyî Berdan Ozturk, Hemserekê Pêroyî yê DBPyî Salîha Aydenîz û Keskîn Bayindir, Dayîkê Haştîye, parlamenterî, Ferît Şenyaşar û îdarekarê partîye tewrê ci bîyî.

Sancarî kombîyayîş de nê ercnayîşî kerdî: ''Keyeyê Şenyaşarî rê zulo pîl yeno kerdene. Rixmo ke Şenyaşaran ra 3 kesî ameyî qetilkerdene dewlete reyna hêrişê înan kena. Herinda cezakerdişê qetilkeran de Şenyaşarî yenê cezakerdene. Na dewaya ma pêrun a. Ganî ma pêro pîya biqîrê û vengê înan her cade bidê eşnawitene.Têkoşînê edaletî tewr peynî de do ser bikewo. Zîndanan de zî zulm dewam keno. Zîndanî bîyî keyeyê mergî, keyeyê cenazayan. Tecrîd bîyo sîstemê îdarekerdişê nê welatî. Ma do vera tecrîd û mergan û înfazê zîndanan têkoşînê xo bidomnê. Rixmê raporan tepişteyê nêweşî nînê veradayene. Menga peyêne de zîndanan ra 7 cenazayî vejîyayî. No caardişê cezaya îdamî yo. Wextê azadîya embaza Aysele Tugluk û heme tepitşeyanê nêweşan o. Ma do semedtê edaletî têkoşîn bikerê û azadîye bîyarê na herre. 28ê kanûne serrgêra Qirkerdişê Roboskî yo. Qetilkerdişê 34 kesanê ke 17ê înan doman bî xora cînayet o la êyê ke qetilkaran nêvejenê binate ê zî hemkarê sûcî yê. Înanê ke bombarduman kerd ê zî înanê ke ferman da ê zî qetilkarê. Zulm îqtîdar de yo. Hukmat semedê dewamkerdişê îqtîdarê xo welatî cum keno.  Vîjnayîş roja persayîşê hesabî ya. Şar do sandik de înan ra hesab biperso. Wa şikê şima naye ra çînê bo, no îqtîdar do bin bikewo û ma ser bikewê.''