Seba ke ‘Vengdayîşê Haştîye û Komelê Demokratîkî’ yê Rayber Apoyî bireso beşanê komelî yê hîrayan xebatî dewam kenê. DEM Partî bi kampanyaya ‘Seba awankerdişê komelê demokratîkî ma şarî reyde kom benê’ wazena şarî rê qalê prosesî bikera. DEM Partî wazena Amed de mîlyonêk û 145 hezar kesan de pêvînayîşan bikera.

Endama Meclîsê Partîye yê DEM Partî Sema Koç ajansê ma rê derheqê kampanyaya ‘Seba awankerdişê komelê demokratîkî ma şarî reyde kom benê’ de qisey kerd.

Sema Koç ard ziwan ke vengdayîşî zaf bala şarî anto, şar bi rêxistinîyêka cidîye wayîrê vengdayîşî vejîyayo. Sema vat: ‘’8ê Adare û Newroze de şar waran de wayîrê vengdayîşî vejîya. Partîya ma qasê 50 hezar kesan de nîqaş kerd û ercnayîşî kerdî. Nika ma wazenê keye bi keye bigêrê û vengdayîşî ser o qisey bikerê. Ma do qalê prosesî bikerê, pêşnîyaz û rexneyanê xo biresnê şarî. Seba haştîye no kar zaf girîng o.’’

Sema Koç pare kerd ke her war de ê hesreta haştîye anê ziwanî û vat: ‘’Kurdîstan û Tirkîya yê neweyî bi vengdayîşê haştîye do bêrê awankerdene û bidê qezençkerdene. Karê ma seba ney do dewam bikerê. 50 serrî yo şer est o û nê şerî de ma bedelê giranî dayî. Qiseykerdişê haştîye girîng û lazim o. Coka girîng o ke ma her kesî de haştîye ser o qisey bikerê.

Şarê Kurdîstanî rewî ra haştîye wazeno. Ganî ma şarî reyde detayanê vengdayîşî zî pare bikerê. Ma do goş bidê şarî. Seba qedînayîşê zeraranê nê şerî û seba caardişê waştişanê şarî ma do têkoşîn bikerê.’’