Serekwekîlê Grûba DEM Partî Sezaî Temellîyî ard ziwan ke  pêvînayîşê  bi Wezîrê Edaletî Yilmaz Tunçî do dewam bikerî û nê vatî:

''Pêvînayîş her çîyî ra ver zaf pozîtîf ravîyart û pêvînayîşêko muhîm bi. Xora ma zanê mumkun nîyo ke pêro meseleyî nê pêvînayîşî de bêrê halkerdene. Pêra zî do pêvînayîşî bêrê kerdene. Nê pêvînayîşî de ma çîyî muhîmî girewtî dest. Çunke paketêkê hukmî yeno hazirkerdene. Ma waştêne paketê hukmî wa nê meseleyan sero vindero. Coka pêvînayîşêko baş bi.

La rojdemê me yo ke nêbedilîyeno xora holkerdişê şertanê cuye û xebityayîşî yê Birêz Ocalanî yo. Keso ke wina hêzdar tesîrê sîyasetî keno û eşkeno zaf çîyan bibedilno şertê ci yê xebityayîşî çîn ê. Çîyo winayên nîno qebulkerdene. Gerek na babete bêro holkerdene. Ma no waştişê xo ard ziwan.

Înan zî vat ê sey Wezîrîya Edaletî eşkenê mîyanê nê mezûatê fermî de se bikerê. Vat bedilnayîşê mevzûatî gureyê wezîrîye nê gureyê meclîsî yo û çîyo ke bikewo milê înan do bikerê.

Ma meseleyê sey tepişteyê nêweşî, serûberkerdişê înfazî, heyetê çimdarîye yê îdareyî, cezayê dîsîplînî û dewaya Kobanê û xeylê meseleyê bînî girewtî dest. Înan zî nê not girewtî. Ma zaf israr kerd ke wa no paketê hukmî bi hesasîyetî bêro hazirkerdene.  Înan zî vat ê bi xo na mesele ser gurîyenê. Înan biney qala ci kerd la ma vat no qîm nêkeno. Înan vat ê do serûberkerdişî newe ra çimî ra ravîyarnê. Ma pê bawer ê ke paketê hukmî de do tesîrê pêvînayîşê ewroyî bibo. Xora eke paket bêro meclîs ma do tîya de zî xebatanê xo bidomnê. Nika hukmo biedalet hewce keno.''