Vervatoxa DEM Partî Ayşegule Dogan derheqê averşîyayîşanê sîyasîyan ê rojdemî de merkezê pêroyî yê partîya xo de kombîyayîşê çapemenîye kerd.

Ayşegule Dogan derheqê komîsyonî de yo ke yeno plankerdene ke meclîs de bêro ronayene nê vatî: “Ewro ma vînenê ke hem partîyanê sîyasîyan de hem zî komel de tay mutabakatî est ê. Esas de wina yew mutabakat est o. Wa komîsyon bêro ronayene. Ma sey DEM Partî nê bi keyfweşî verwazî kenê. Deste ma taslagêk est o. Ma do nê taslagî sey partîyanê bînan roja dişemeyî Serekê Meclîsî Numan Kurtulmuşî rê teqdîm bikerê. Eşkerayîyê Serekkomar Erdoganî zî est ê. Nê pêro konsesuse pêroyî nîşan danê. Nika ez nêeşekna derheqê nê de zanayîşê hîrayî bidî. Ma vanê ke wa çekî bi temamî dewre vejîyê û semedê nê pêro mekanîzmayî bikewê dewre. Gerek tepişteyê nêweşî zî cade bêrê veradayene. No gerek têna rojdemê DEM Partî nêbo, gerek pêro partîyê sîyasîyî vera nê tewir bîgîrê.’’