Goreyê agahîyan kesê ke verê bînayanê HDPyî yê Amed, Wan û Colemêrgî de  ronişenê înan dewlete reyde seba pereyan û kadroyî peymane viraşte.

Hemserekê HDPyî yê Colemêrgî Lokman Ozdemîrî derheqê babete de ANFyî rê qisey kerd. Ozdemîrî ard ziwan ke nêzdîyê di serrî yo tay kesî verê bînaya HDPyî de nişîyenê ro û vat: ''Nê kesî ma rê û şarê ma rê heqaret, neheqî û dişmenîye kenê.''

Ozdemîrî dîyar kerd ke domanê zafê nê kesan zî nêşîyê verê bînaya HDPyî û vat: ''Delîlê ney verê destê ma de yê, nameyê înan zî est ê. Kam wazeno ma nameyan ci rê vajê. Rixmo ke domanê înan nêşîyê koyî verê bînaya ma de, ma rê heqaretan kenê. Nînan ra tay kesî seba ke dewlete ra kadroyî bigêrê tayê bînî zî seba ke pereyan bigêrê dewlete reyde peymanêke kerda. Ê heqaretê ma kenê û bi nê hawayî plan kenê ke sebrê ma biqedînê, ma provake bikerê ke ma hêrişê înan bikerê. Ma do nêkewê dafika înan.''

Ozdemîrî pare kerd ke nê kesan ra zaf tenî zî Colemêrgî ra nîyê zî û vat: ''Ma nêwazenê ke hînî bêrê. Ma wazenê no şer biqedo û kes nêro kiştene. Êyê ke îdîa kenê ke domanê înan şîyê koyî wa nêrê tîya wa şorê seba ke gonîye nêrija têkoşîn bikerê.''