Organîzatorê Rayraşîyayîşê Gemlîkî Hemsereka Partîya Herêmanê Demokratîkan (DBP) Salîha Aydenîz ANFyî rê derheqê rayraşîyayîşî de qisey kerd.

Aydenîze da zanayene ke polîtîkaya tecrîdî ya Îmraliyî ewro vurîyaya metodêkê îdareyê Tirkîya û vist vîrî ke Rayberê Şarê Kurdî Abdullah Ocalanî 1999 ra nata Zîndanê Îmraliyî de tepişîyeno. Aydenîze vat: ''Bi bahaneyan pêvînayîşê keye û avûkatan ê bi Ocalanî yenê astengkerdene. Ganî ma kesê ke bedelî dayê xo vîr a nêkerê. Rixmê şertanê tecrîdî zî Birêz Ocalan xîret keno ke demokrasî û haştîye bêrê welatî. Ewro tecrîdê Îmraliyî her cayî ra vila bîyo. Sebebê krîzê ekonomîkî zî no tecrîd o. Ma roja yewşemeyî seba ke verê sîstemê tecrîdî bigêrê bi şîarê 'Vera polîtîkayanê tecrîdî pawitişê azadîye' ver bi Gemlîkî şorê. Ma venga pêro beşanê komelî û rêxistin û dezgehan danê ke wa tewrê nê rayraşîyayîşî bibê û tecrîdî bişiknê.

Îqtîdarê AKP-MHPyî tecrîdî seba mendekerdişê îqtîdarê xo şuxilneno û dewlete zî bi spekulasyonanê serê tecrîdî keno ke komelî konsulîze bikero. Dewleta tirke 100 serrî yo wazena kurdan qir bikera. Tewirê AKP-MHPyî zî wina yo. Ganî hînî no sîstemê dewlete bicurîyo. Şarê kurdî hînî çareserîya meseleya kurdan wazeno û pê qiseyan nêxapîyeno. Muxalefetê Tirkîya Amed de vano 'rayîrê demokrasî Amedî ra derbaz beno' la Anqara de paştî dano polîtîkayanê şerî yê îqtîdarî. Şarê Kurdî hînî nê kerdişan bi zelalî vîneno. Coka pabeyê pratîkan o qiseyan nê.''