Vervatoxa Meclîsê Cinîyan ê HDPyî Ayşe Acar Başaran merkezê pêroyî yê partîya xo de kombîyayîşê çapemenîye de qisey kerd û rojdem ercna.

Qiseykerdişê Başarane ra beşêk wina yo:

''Seke zanîyeno ma tewrê dewaya vera betalkerdişê Peymana Îstanbulî bîyî. Seke uca de Pervîne Buldane vatbi HDP nameyê pêro cinîyan Peymana Îstanbulî uca de pawite. Dewa de selahîyetdaranê dewlete reyna manîpulasyon kerd. Betalkerdişê peymane ra nata şîdetê vera cinîyan zêdîya, tewr tay 495 cinîyî ameyî qirkerdene. Têna gulane de 32 cinîyî ameyî qirkerdene. No îqtîdar pêro cinîyan keno hedef û şîdetê vera cinîyan teşwîq keno. Ma seba cinîyanê ke qetil bîyê, seba caardişê edaletê raştikênî do Peymana Îstanbulî bîyarê ca. Ma venga pêro cinîyan danê ke Peymana Îstanbulî bipawê û tewrê têkoşînê hemparî bibê.

Bingeyê pêro meseleyanê Tirkîya de tecrîdê vera Birêz Ocalanî est o. Ma do 12ê hezîrane de vera tecrîd û polîtîkayanê şerî sey KCD, partîyanê sîyasîyan û cinîyan ver bi Gemlîkî şorê.

Nê rojanê peyênan de operasyonanê vera Êlih, HDK, GOÇÎZ-DER, HDK û partîya ma de xeylêk embazê ma tepişîyayî. Reyna nê rojan de 21 rojnamegerî ameyî destbendkerdene. Îqtîdar wazeno çapemenîya azade bêveng bikera. Ma reyna îfade kenê ke ma hetê rojnamegeran de yê. Vera nê hêrişan ma 12ê hezîrane de ver bi Gemlîkî şinê. Ma do vera nê polîtîkayan uca de vengê xo hîna zaf berz bikerê. Ma Konferansê Cinîyan kerd. Ma do 3ê temmuze de Kongreya xo ya 5. bikerê. Ma sey cinîyan bi kelecanî amadekarîya kongre rê dewam kenê. Ma na kongre de zî bimojnê ke hêrişî do pê ma nêeşkê.''

Başarane rê ame perskerdene ke derheqê Rayraşîyayîşê Gemlîkî de heta 15ê hezîrane qedexeyê aktîvîteyan est o û naye ser o çi fikirîyena. Başarane wina cewab da persî: ''Ma nê qedexeyan nêşinasnenê. Planê ma do nêvurîyê. Şarê ma do Tirkîya û çar parçeyanê Kurdîstanî ra bêro û ma do ver bi Gemlîkî şorê.''