Merkezê Pêroyî yê HDPyî de hetê HDK, KCD, TJA, HDP, DBP û MED TUHAD-FED û avûkatanê Buroyê Huqûqî yê Asrinî ra derheqê tecrîdê Îmraliyî de kombîyayîşêk ame kerdene. Kombîyayîş de dîya eşnawene ke ê do vera tecrîdê Îmraliyî 12ê hezîrane de bi şîarê Vera sîyasetê tecrîdî ma semedê pawitişê azadîye ver bi Gemlikî rayra şinê dest pê rayraşîyayşî bikerê.

Metno hempar ê dezgehan hetê Hemserka Pêroyî ya DBPyî Salîha Aydenîz ra ame wendene. Eşkerayîye de nê ameyî vatene:

''Tirkîya her hetî ta wextê xo yê tewr tengî de ya. Îqtîdar keno ke krîzan binimino la ma zanê ke rewşe senî xirab a û pê nê îqtîdarî nêbena hole. Sebebo tewr pîl krîzanê sîstemkîyan meselaya kurdî ya. Çarenêkerdiş hetê îqtîdarî semedê teslîmgirewtişê muxalefetî yeno şuxulnayene. Semedê hûzûrê welatî ganî no îqtîdar bêro wardayene.

Birêz Ocalano ke verî ra heme kayan û tehlukeyan ra hayîdar o tim keno ke meselaya kurdî bêro çarserkerdene. Ey tim vera menfeatê  partî û îqtîdarî kişta cinîyan, şaran, kedkaran de ca girewt û goreyê bawerîyan û xoza têgêra. 23 serrî yo Îmrali de menfeatê komelî paweno.  Na çarçewe de Girawa Îmraliyî vera koltetîye bîye warê têkoşînê demokrasî û azadîye.

Tecrîdê Îmraliyî hêdî-hêdî heme welat girewt binê tesîrê xo. Tarîxê ma yê nêzdî de wextê pêvînayîşanê Îmraliyî de ma dî welat de senî gamê xurtî yê semedê kulturê demokrasîyî ameyî eştene. Ewro  wextê xorîkerdişê tecrîdî de zî ma rewşa xirabe vînenê. Coka ma vanê ke veravejîyayîşê tecrîdî semedê çareserkerdişê meselaya kurdî tewirêk o. Ganî vera tecrîdê Îmraliyî hetê etîk, polîtîk û huqûqî ra nêrazîbîyayîş xurtêr bo.

Vera sîyasetê şerî yo ke binê nameyê 'operasyonê wetê sînorî' de yeno kerdene, ma polîtîkaya cuye ya heme nasnameyanê bindestan û xoza pawenê. 25ê adara 2021î ra nata Birêz Abdullah Ocalanî ra xebere nîna girewtene û ma zaf qesawet kenê. Ma nê qebul nêkenê. Coka ma do 12 hezîrane de bi şîarê 'Vera sîyasetê tecrîdî ma semedê pawitişê azadîye ver bi Gemlikî rayra şinê'  dest pê rayraşîyayşî bikerê. Ma veng danê heme dormeyanê hîsgêran, dost û rayapêroyaya demokratîke wa paştî bidê ma.''