Endama Konseya Hemserekîya Pêroyî ya KCKyî Sozdare Avesta Stêrk TVyî rê serrgêra şehadetanê înan de qalê Zeynepe Kinaci (Zîlane), Sema Yuce (Serhildane), Alî Haydar Kaydar (Fuat) û Dîyar Xerîbî (Helmet) kerd.

Qiseykerdişê Sozdare Avesta ra tayê qismê girîngî wina yê:

‘’Ez hêverî Şêx Seîd û embazanê ci yad kena ke 100 serrî verî ê ameybî dardekerdene. Ê çaxî ra nata Kurdîstan de înkar, îmha, qirkerdişî dewam kenê. Rayber Apoyî zî vera nê kerdişan têkoşînê azadîye dabi destpêkerdene.

Şehîdî vîrê komelê ma, erjê ma û qîmetê ma yê. Têkoşînê şehîdanê ma ra nêbîyêne ewro ne kurdî ne Kurdîstanî mendibî. Ma deyndarê şehîdanê xo yê.

Embaza ma Zîlane vera xîretê suîkastê serê Rayber Apoyî çalakîya fedayîye kerdibî. Embaze Zîlane Rayber Apo hol fam kerd. Aye zanayêne ke pawitişê Rayber Apoyî pawitişê azadîye, cinîyan û Kurdîstanî yo. Ewro ma zî xeta Zîlane de pusulaya xo û modelê xo yê cuya azade dî. Embaze Zîlane bi çalakîya xo rayîr û metodî mojnabî. Wextê çalakîya embaze Zîlane de taktîkê gerîlayan xo dibare kerdêne. Rayber Apoyî çalakîya embaze Zîlane sey xîretêk ercna, taktîkê neweyî afernayî.

Embaze Sema o çax zîndan de bîye. Aye çalakîya Zîlane hol ercnaye. Embaze Sema vatêne ‘ganî ma çalakîye bikerdêne.’ Embaze Zîlane zîndanan de vera xeta tasfîyekere girewt. Yanî embaze Zîlane teber de embaz Sema zere de vera hêrişan tewir mojna û yewbînî temam kerdî.

Çalakîya embaze Zîlane ra serrêke pey Yewîya Azadîya Cinîyanê Kurdîstanî (YAJK) ronîyaye. Rayber Apoyî metod û rayîrê rêxistinbîyayîşê cinîyan, metodê azadbîyayîşê cinîyan û vurîyayîşê camêrdan YAJKî reyde vetî werte.

Embaze Zîlane bi xo elewîye bîye, a wayîra kulturê Seyîd Rizayî bîye. Coka aye çalakîya xo Dêrsim de kerde. Rixmo ke 29 serrî verî aye çalakîya xo kerdibî hema zî na çalakîye manadar a. Milîtananê azadîye yê sey Sema, Leyla Agirî, Bêrîvane Zîlan, Raperîne, Delal û Armance xeta Zîlane ser o têkoşîn kerd.

Şehadetê embaz Fuatî 7 serrî xo pey de verdayî. Embaz Fuat embazanê Rayber Apoyî yê verênan ra yew bi. O zî domananê Terteleyê Dêrsimî ra yew bi. O Dêrsim de bibi pîl coka bi şahîdê kerdişanê dewlete. Embaz Fuatî embaze Sara reyde Dêrsim de serkêşîya têkoşînî û cuya newîye kerd. Rayber Apoyî seba embaz Fuatî vatêne ‘Ey mi ra zafêr wendêne, fam kerdêne.’ Embaz Fuatî Rayber Apo hol fam kerd û perwerdeyan de tim o hol da famkerdene. Ey pratîkê xo de zî kerdişê Rayber Apoyî ardêne ca. Şehadetê ey seba ma zî, keyeyê ci zî, welat û şarê ma dejêko pîl o. Eke ma bi terzê ey têkoşîn bikerê ma do bibê layîqê ci. Embaz Fuatî vatêne ‘Qibleyê mi YJA-Starî yo.’ Embazîya ey a bi cinîyan nimûneyêka girîng a. Ey tim girîngîyêka pîle daye têkoşînê cinîyan.

Embaz Helmet şehîdanê hezîrane ra yo. Embaz Helmeto ke Başûrî ra yo, dima ke tewrê gerîlayan bi cade sey serkêşêkî vejîya vernî. Ey Rayberîye ra perwerde girewt û fikrê Rayberîye hol fam kerdî. Embaz Helmetî mojna ke ganî lîderê Başûrî senî bibê. Ey wendêne, nuştêne û  têkoşîn kerdêne. Ey Başûr de kedêka pîle daye. Şehadetê embaz Helmetî xora ma rê zaf tesîr kerd. La ewro xeta ey de têkoşînêko pîl yeno kerdene. Embaz Helmetî tim seba yewîya kurdan xîret kerd. Coka şarê pêro parçeyanê Kurdîstanî ey ra zaf hes kerd.

Nika ma prosesêkê girîngî ra derbaz benê. Ganî ma çarçewa Vengdayîşê Haştîye û Komelê Demokratîkî yê Rayber Apoyî de haştîya zereyî bîyarê ca û bi nê hawayî keda şehîdanê xo pûç nêkerê. Şehîdê ma ferman danê ke ma yewîya xo awan bikerê, têkoşînî ser bivisnê û şarê Kurdîstanî biresnê cuya azade. Ma soz danê şehîdanê xo ke nê fermanî bîyarê ca.

Hetê bînî ra ganî cinîyî bibê serkêşê nê prosesê Haştîye û Komelê Demokratîkî. Ganî xeta Zîlane, Sema, Fuat, Leyla û Rizayan de têkoşîn bêro kerdene. Rayber Apoyî seba azadîya şarê ma na hemle daye destpêkerdene. Ma do na hemle ser bivisnê.’’