Vervatoxa HDPyî Ebru Gunay merkezê pêroyî yê partîya xo de kombîyayîşêkê çapemenîye kerd.

Gunaye vist vîrî ke ê HDK, KCD, TJA, DBP û MED TUHAD-FEDyî reyde vera tecrîdkerdişê Rayberê Şarê Kurdî Abdullah Ocalanî ver bi Gemlîkî, 12ê hezîrane de rayraşîyayîşêkî bikerê. Gunaye îfade kerd ke key Îmrali de rayîrê pêvînayîş û dîyalogî ameyî akerdene, kulturê demokrasî yê Tirkîya berz bi û Îmraliyî ra qetî vera şar û komelî pêşnîyazêk nêame kerdene.

Gunaye vat: ''Îmrali de qetî tabloyêko tarî nêame mojnayene. Tim seba demokrasî û çareserîye pêşnîyazî ameyî kerdene. Tecrîdê vera Birêz Ocalanî vurîyayo birnayîşê têkilîye. Polîtîkayê tecrîdî her ca ra vila bîyî û pêro komel ho yeno tecrîdkerdene. Coka ma vanê ke têkoşînê vera tecrîdî erkêko komelkî yo, reçeteya felatî ya. Kam wazeno peynîya nê sîyaset û krîzî bîyaro, kam wazeno kay û dafikanê serê îşxal û şerî vîneno ganî her çî ra ver xo ver bido û bivîno. Coka vera tecrîdî têgêrayîş seba haştîye gamêka girîng a. Vera tecrîdê giranî yê Îmraliyî têkoşîno huqûqî û sîyasî bingeyê têkoşînê demokrasî yo.

Rejîmê înfazî yê muebeda girankerde ganî goreyê biranê Mehkemeya Heqanê Merdiman a Ewropa û pêşnîyazanê Komîteya Wezîran a Konseya Ewropa bêra qedînayene. Ganî Zîndanê Îmraliyî bêro qefilnayene, sîstemê tecrîdî yê Îmraliyî bêro wedaritene. Çareserîya demokratîke ya meseleya kurdan ganî bêra caardene. Coka ma vera tecrîdî 12ê hezîrane de, bi şîarê 'Vera sîyasetê tecrîdî, seba pawitişê azadîye verê xo bidê Gemlîkî' do rayraşîyayîşêkî bikerê. Ma venga şarê xo û rayaumûmîya demokratîke danê ke tewrê rayraşîyayîşî bibê.''