Endamanê Platformê Pawitişê Hevselî Guner Yanliç û Vehap Işikliyî derheqê janê Korona de ANFyî rê qisey kerd.

 Nêweşîya tewr pîle sîstemo kapîtalîst o

Aktîvîst  Guner Yanliçî bale ante ser ke sebebê vîrusê Korona yo ke tira bi hezaran kesan cuya xo vînî kerde sîstemo kapîtalîst  û polîtîkayê ci yê talan û çînkerdişî yê û vat: ''Sîstemo kapîtalîst verê ci sî krîzî açarnayî firsend û hîna bihez bîyî. AKP bi qanûnê ke vetî vernîye talanî akerd. Ganî xoza bêro pawitene û cuyeyêka ekolojîke bêro awankerdene. Heta ke sîstemo kapîtalîst bibo do janî zî bibê. Xora nêweşîya tewr pîle zî sîstemo kapîtalîst o.''

Badê Korona do çîyêk zî sey verî nêbo

Vervatoxê Endamanê Platformê Pawitişê Hevselî Vehap Işikliyî zî ard ziwan ke badê Korona do çîyêk zî sey verî nêbo û vat: ''Nê prosesî de ganî sere de têgêrayîşê ekolîjîkî û ê cinîyan heme awanîyê ke vera sîstemî yê bêrê têhet û bi fikirîyê ke senî komelî rê danê qezenckerdene. Ma nêeşkenê bi fîkranê kahanan dinyayêka newî awan bikerê. Tirkîya de hetêkî ra şarî ra vajîyeno ke keyeyanê xo ra mevejê hetê bînî ra polîtîkaya talanî kewtê dewre. Ganî ma agêrê xoza, bêro xo ser û vera nê sîstemê talankerî xoverdayîşî xurt bikerê.''