Serkêşîya HDK, KCD, TJA, HDP, DBP û MED TUHAD-FEDî de bi şîarê ''Ma vera sîyasetê tecrîdî semedê pawitişê azadîye ver bi Gemlîkî şine'' Rayraşîyayîşê Gemlîkî ame organîzekerdene. Şar semedê tewrbîyayîşê Rayraşîyayîşê Gemlîkî yo ke semedê azadîya Rayber Şarê Kurdî Abdullah Ocalanî yeno kerdene Bursa de kom beno.

Bajaranê cîya cîyayan ra şarê ke verê xo da Gemlîkî Warê Newrozê yê qezaya Yildirimî yê Bursa de kom beno. Polîsanê ke dekewtiş û vejîyayîşê xelêk bajaran û qezayan de nuqtayê kontorlî nayî ro bi bahaneyê qedexeyê çalakîyan ê walîtîye vanê ê do destûrê çalakîye medê. Warê Newroze  yo ke warê destpêkerdişê rayraşîyayîşî yo binê ablûqaya polîsan de yo. Xeylêk nuqtayan de  kontrolê Arêdayîşê Hayîdarîyanê Pêroyîyan (GBT)  yeno kerdene. Banê HDPyî yê Gemlîkî zî binê ablûqaya polîsan de yo. Polîsan warê destpêkerdişê rayaşîyayîşî de şar girewt binê ablûqa û bi destbendkerdişî tehdît keno. Rixmê astengkerdişê polîsan şar tîya yeno pêser.