Seba ke destnêpanayîşê Wekîla HDPyî ya Amedî Semra Guzel ame wedaritene çalakîyê nêrazîbîyayîşî dewam kenê. Dêrsim û Çewlîg şar seba ke nêrazbîyayîşê xo ramojno vejîya kuçeyan.

Rêxistina HDPyî ya Dêrsimî verê banê xo ra heta Kuçeyê Sanatî rayraşîyayîş kerd. Wekîlê HDPyî yê Dêrsimî, temsîlkarê partîyanê sîyasîyan û dezgehanê komelê sîvîlî tewrê çalakîye bîyî. Çalakwanan  bi slokanan vera zextan hêrsê xo ard ziwan û vat zextî nêeşkenê verê ma bigêrê. Badê rayraşîyayîşî eşkerayîye ameye dayene. Hemsereka HDPyî ya Dêrsimî Nazli Çelîk Oz bale ante zextanê vera partîya ci û vat: ''Kurdî û muxalîfî yenê hedefgirewtene. Ma do rixmê heme hêrişan têkoşînî rê dewam bikerê.''

Rêxistina HDPyî ya Çewlîgî zî vizêr seba ke polîtîkaya qirkerdoxe ya îqtîdarî ya ke îradeyê şaran nêvînayîşî ra yena protesto bikero verê Kuleyê Saete de eşkerayîye daye. Eşkerayîye de hêrişê vera HDPyî ameyî şermezarkerdene û  mesajê paştdayîşî yê semedê Semra Guzel  ameyî dayene.