Wekîla HDPyî ya Agirî Dîlane Dîrayet Taşdemîr derheqê îşkence, teda û qirkerdişanê vera tepişteyan de ANFyî rê qisey kerd.

Taşdemîre bale ante zêdîyayîşê xeberanê mergî û îşkenceyî yê zîndanan ser û vat: ''A raşte zîndanî sey eqsê polîtîkayanê şiknayîşê îrade û teda yê teberî hînî sey laboratuwarê şîdetî şuxilîyenê. Nika prosesêko winasên esto ke merdimî bi hawayêkê keyfî erzîyenê hucreyan, înfazê tepişteyan yenê vêşnayene. Wextê prosesê 12ê Êlule de zî dewlete seba ke îradeyê kurdan bişikna kerdişê winasênî ardbî ca û merdimî eştbî zîndanî. Hişmendîya darbe pê şîdetê zîndanan waştêne mesajêk bida teberî. Nika zî prosesêko winasên esto. Îqtîdarê AKP-MHPyî zîndanan de polîtîkayêka taybete ano ca.''

Taşdemîre pare kerd ke tepişteyan rê teslîmîyet yeno ferzkerdene û vat: ''Nêno waştene ke çew vera ney vengê xo vejo. Binê kontrolê Wezîrîya Edaletî de tepişteyê ke îqtîdar ganê nînan ra mesuldar o yenê qetilkerdene. Garîbe Gezer pê mektuba xo îşkence û kerdişê bînî eşkera kerdbî. Wezîrîya Edaletî derheqê babete de tehqîqat zî anêkerd. Zîndanî pê kurdan, şorişgêran, cinîyan û demokratan dekerde yê. Zîndanan de nê merdiman rê mesajê 'Şima teber de sîyaset kerd, xo ver da, teslîm nêbîyî la ma şima rê teslîmîyet ferz kenê' yeno dayene.''