Hetkarê Hemserekanê HDPyî yê Komîsyonê Heqanê Merdiman ra Berpirsîyar Umît Dedeyî hêrişê vera partîya xo ercnayî.

Dedeyî vist vîrî ke wextê ronayîşê xo ra HDP raştê hêrişê hukmatî yeno û vat: ''Bitaybetî vîjnayîşê  2015 de vera HDPyî hêrişê linckerdişî ameyî destpêkerdene. Rixmo ke HDP binê nê zext û hêrişan de tewrê vîjnayîşî bi, serkewtişêko pîl fîna dest. Serkewtişê HDPyî sernêkewtişê AKPyî aferna. Seba ke îqtîdarê AKPyî vînî kerd, nê hêrişan bi zêdîyayîşî dewam kerd.''

Dedeyî tepiştişê hemserekanê pêroyî yê partîye Selahattîn Demîrtaş û Fîgene Yuksekdag yê 4ê kanûna 2016î sey mîladî name kerd û vat: ''Pîya bi hemserekanê ma destnêpadayîşê wekîlanê ma zî ame wedaritene. A roje ra heme wekîle ma yê ke zîndan de yê estê. Wedartişê destnêpadyîşî têna hetê hukmatî ra nê hetê muxalefetî ra zî tewirê ewnîyayîşê huqûqî yê Tirkîya ramojna.''

Dedeyî wina dewam kerd: Tepiştişê endamanê Heyetê Rayberdişî yê Merkezê HDPyî zî goreyê huqûqî nîyo. Her çîyî ra ver seba ke dozgerî hewteyêk verê operasyonî Hemserekê Pêroyî yê HDPyî zîyaret kerd, têna no xo ramojneno ke tîya bêhuqûqîya pîle esta. Seba ke derheqê dosya de qerarê nimitişî esto ma detayanê ci nêzanê. La seba ke badê 6 serran cipêrsayîşêk ewro reyna ameyo germinkerdene û ameyo rojdemkerdene no ne ma ne zî rayapêroyî îkna keno.

Serebutê Kobanê ganî bêrê eşkerakerdene. Na çarçewe de partîya ma xeylêk rey waşt ke  wa meclîs de komîsyonê cipêrsayîşî bêro ronayene la waştişê ma tim hetê AKP-MHPyî ra yeno redkerdene. Operasyonê vera HDPyî huqûqî nîyê. Seba ke paradîgmaya HDPyî hetê şarî ra yena wayîrvejîyayene, îqtîdar hêrişê ci keno. Îqtîdaro ke hetê sîyasetî ra nêeşeknê partîya ma, wazeno ke bi hêrişan verê ma bigero ke ma nêresê komelî. Komel de tarîxê komare ra heta nika bawerîya vera huqûqî hende kêm nêbîyebî. Hînî hukm xo mîyan de zî yewbînan ra bawerî nêkeno. Dadgerî edaletê yewbînan ra bawerî nêkenê, ma do senî hukmê tirkî ra bawerî  bikerê. Xora bawerîya ma zî ci ra çîna .''