Hemsereka Şubeyê Anqara ya Komeleya Heqanê Merdiman (ÎHD) Sevîle Turgut derheqê rewşa tepişteyanê nêweşan de ANFyî rê qisey kerd.  

Sevîle Turgut ard ziwan ke mergê Garîbe Gezer tesîrê her kesî kerd û seba ke derheqê dosyaya tehqîqatê mergî de bira nimite dîyaye qesawutê serê mergê aye zêdîyayî. Sevîle Turgut waşt ke ganî mergê Garîbe ser o tehqîqatêko xurt bêro kerdene û pêro mesuldarê nê serebûtî bêrê cezakerdene.

Sevîle Turgut da zanayene ke zîndanan de têkoşînê tepişteyan ê nêweşan dewam keno û vat: ''Tepişteyê nêweşî seba ke çarçewa qanûnê 'têkoşînê vera terorî' de yenê ercnayene nênê weşkerdene. Ma her hewte tepişteyanê nêweşan kenê rojdem. Xeylêk tepişteyê kokimî estê ke ganî bêrê veradayene. Bi huqûqê dişmenîye nêzdîyê tepişteyanê nêweşan yeno kerdene. Seba ke şerê berdişê nêweşxaneyî xirab ê, tepişteyî wesayîtê rîngî de û wextê muayene de yenê kelemçekerdene tepişteyê nêweşî zî nêwazenê şorê nêweşxane. Nika zîndanan de xeylêk tepişteyê nêweşî estê. Tîya Tirkîya ya. Beno ke rojêke her kes bêro tepiştene. Seba tepişteyanê nêweşan ganî pêro komel hîsger bibo.''

Hemsereka Şubeyê Anqara ya ÎHDyî Sevîle Turgut îfade kerd ke heta ke waştişê înan bêrê qebulkerdene ê do têkoşînê xo rê dewam bikerê. Sevîle Turgut vat: ''Ganî keyeyê tepişteyan, pawitoxê heqanê merdiman û komel yew bibê û seba tepişteyanê nêweşan têbigêrê. Seba ke hîna zaf tepişteyî nêmirê ganî her kes wayîrê tepişteyanê nêweşan vejîyê û paştî bidê keyeyanê tepişteyan.''