Seyîd Riza û hemrayê ey bi çalakîyêke ke bereyîya ci Fedarasyonê Komeleyanê Dêrsimî (DEDEF) û Fedarsyonê Yewîya Dêrsimî yê Demokratîk yê Ewrupayî (ADEF) kerde amey vîrardene. 

Vîrardişo ke Meydanê Îskeleyî yê Kadikoyî de ame kerdene de parlementerê HDPyî Zuleyda Gulum, Musa Pîroglu û gelek temsîlkarê partî û organîzasyonanê demokratîkan amede bîy.

Meydan de pankarta “ma çîyêk nêkerdo, ma çîyêk zî efû nêkenê” ameye akerdene û 37-38 çirayî ameyî tafîştene. 

Deqeyêk rêzgirewtişî ra dima endamê komîteya îdarekaran ê DEDEFî ra Hasan Şenî qisey kerd û dîyar kerd ke polîtîkayê asîmîlasyonî yê Jenosîdê Dêrsimî bi veşnayîşê birran, destsernayîşê qeyuman dewam kena.Dima nameyê DEDEF û ADEFî ser o Ulaş Yegînî beyanatêko hempar da.

Yegînî ard ziwan ke sere de Seyîd Riza, rusipîyê Dêrsimî ke bi puşilan ameyê qetilkerdene, dima vera şarê Dêrsimî yew galo ke dinya de çirey nîyamo dîyene ameyo kerdene û şar ameyo qirkerdene. 

Yegînî waştişê DEDEF û ADEF rêz kerdî:

 “Wa arşîvî bêrê akerdene û nameyê Dêrsimî apey bêro dayene.

Şarê Dêrsimî ra ef bêro waştene.

Lîsta sirgûn, vîndîbîyaye û domanê ke dayîyê keyeyanê bînan bêra eşkerakerdene.

Gorê Seyîd Riza û hemrayanê ey bêrê dîyarkerdene.

Azadîya ziwan û bawerî yê qizilbaş-elewîyan bêra naskerdene

Projeyê bendawe Munzurî bêrê betalkerdene.