Seyîd Riza û embazê ci serrgêra 83. ya dardekerdişê înan de Adana de bi merasîmêk ameyî yadkerdene. Merasîmo ke Komeleyanê Elewîyan ê Demokratîkan (DAD) û Komeleya Dêrsimî pîya serûber kerd Wekîlê HDPyî yê Adana Kemal Pekoz, temsîlarê partî, dezgeh û rêxistinan tewrê ci bîyî.

Merasîm bi gulbangê Pîr Zeynel Keteyî dest pêkerd û dima seba Seyîd Riza û embazanê ci deqayêk rêz ame girewtene.

Keteyî merasim de qisey kerd û vatişê dadîyêka ke Terteleyê Dêrsimî ra xelisîyaye vîst vîrî: ''Kerra bibîyêne teqayêne, erd bibîyêne pê nêeşkayêne.'' Keteyî vat: ''Dêrsimijan sere nêwedaritbi. Ê hetê dewlete ra bi planan ameyî qetilkerdene. Seyîd Riza û embazê ci 15ê teşrîna peyêne yê 1937î de ameyî dardekerdene. Seyîd Rizayî îdamî xo ra verî têna waşt ke wa hêverî o bêro dardekerdene lajê ci nê. La no waştişê ci zî nêame caardene. Ma do serrgêra 83. ya Terteleyê Dêrsimî de nê qirkerdişî reyde reyna bêrê têrî û tewirêkê rûmetênî bimojnê. Ganî ma yewîya xo zixm bikerê û haştîye bipawê. Mazlûm bêçare, mekan bêriza û wext bêwayîr nîyo.''

Wekîlê HDPyî yê Adana Kemal Pekozî zî vat: ''Terteleyê Dêrsimî ra dima dewlete nareye xîret kerd ke Dêrsim bêvîr verda û qirkerdişêko kulturel kerd. No qirkerdişo kultrel hema zî bi talanê Çimeyanê Munzurî û cayanê bînan ê Dêrsimî dewam keno. Ma wazenê cayê goran bêrê dîyenê û hesabê kênayan ê vînbîyayeyan bêro persayene.''

Merasîm bi vilakerdişê loqmayan qedîya.