Seyîd Riza û embazê ci 83 serrî verî 15ê teşrîna peyêne ya 1937î de ameybî dardekerdene. Rêxistinanê elewîyan û dezgehanê demokratîkan xeylêk şaristanan de Seyîd Riza û embazê ci yad kerdî.

Dêrsim

Dêrsim de virardişo ke hetê Platformê Kede û Demokrasîyî yê Dêrsimî ra ame organîzekerdene Meydanê Seyîd Rizayî de ame kerdene.

Parlamenterê HDPyî Fatma Kurtulan, Kemal Bulbul, Zeynel Ozen, Tulay Hatimolugullari û Alîcan Onlu ya pîya xeylê temsîlkarê partîyanê sîyasîyan û dezgehanê komelê sîvîlî û rêxistinanê dmeokratîkî tewrê ci bîyî. 

Vîrardişo ke  bi rêzgirewtişî dest pêkerd de çekuyê ''vîrê ma de yê, ma înan yad kenê û xo vîrî ra nêkenê'' ameye vîrardene  û ame vetene ke înanê ke Terteleyê Dêrsimî kerd, înanê ke çeke û gazê kîmyewî peyda kerd û êyê  ke vera terteleyî bêveng mendî tewr tay hendê qetilkaran sûcdar ê. Coka ganî êyê ke tewrê nê terteleyê sîvîlî bîyî ganî lezabez nê şermî de bêrê têrî.

Badê eşkerayîye Pirdê Paxî ser ra vilîkî erzîyayî Çemê Harçikî.

Anqara

Komeleyanê Elewîyan ê Demokratîkan (DAD), Komeleya Dêrsimijan a Anqara, Komeleya Gumgumî ya Anqara, Komîteya Muzeyê Madimakî, bînaya DADî ya Anqara de merasîmêk serûber kerd. Wekîlê HDPyî yê Îstanbulî Alî Kenanoglu û rêxistinê komelê sivîlî zî tewrê merasîmî bîyî. Merasîmê yadkerdişî bi deqayêkê rêzgirewtişî dest pêkerd. Dima Hemserekê Dêrsim-Derî yê Anqara Yaşar Kilavuzî qisey kerd.

Kilavuzî vat: ''Gorê Seyîd Riza, Uşenê Seydi, Alîyê Mirzalî Sîlî, Cebrail Hesen Aga, Hesene Îvrahime Qijî, Resik Wuşen û Fındiq Aga nêzanîyenê. Na rewşe nêna qebulkerdene. ''

Merasîm bi wendişê gulbangan û vilakerdişê loqmayan qedîya.

Mersîn

Komeleya Dêrsimijan a Yenîşehîrî ya Mersînî zî bi heman armancî bi beşdarîya temsîlkaranê rêxistinan merasîmêkê yadkerdişî serûber kerd. Merasîm de fotografê Seyîd Rizayî yê bi nuşteyê '37/38 Xo vîr a meke!' ameyî berzkerdene. Beşdaran seba Seyîd Riza û embazê ey çilayî vistî ta û gulnabgî wendî. Serekê Komeleya Dêrsimijan a Mersînî Hasan Tarikutî ard ziwan ke ganî arşîvê dewlete bêrê akerdene û nameyê Dêrsimî apey bêro dayene.