Bi wesîleya serrgêra 85. ya daliqnayîşê înan vizêr Dêrsim û Kadikoyê Îstanbulî de Seyîd Riza û embazê ci ameyî yakderdene.

Dêrsim de hetê Platformê Kede û Demokrasîyî ra Meydanê Seyîd Rizayî de aktîvîteyêke ame organîzekerdene.Wekîlê HDPyî Merale Daniş Beştaş, Îmam Taşçier û Alîcan Onlu, xeylêk rêxistinê komelê sîvîlî, roşnvîr, nuştox û şar tewrê aktîvîte bîyî.

Eşkerayîye de ame vîrvistene ke Seyîd Rizayî senî vera dewleta qirkere de milê xo çewt nêkerd tewirêko sereberz mojna ser û ame vatene ke ê zî do wayîrê nê mîrasê têkoşînî vejîyê.

Merale Daniş Beştaş zî  ard ziwan ke şarê kurdî do çirey Seyîd Rizayî xo vîra mekero û vat: ''Çîyo ke 85 serrî ame kerdene ewro eynî polîtîkaya hêrişkare vera kurdan yena rayraberdene. Ma zî do rêçê pîranê xo de çirey milê xo çewt nêkerê û sereberz têkoşîn bikerê.''

Kadikoyê Îstanbul de zî hetê DEDEF, ADEF û DAMî ra aktîvîteya yadkerdişî ameye kerdene. Eşkerayîye de ame vîrvistene ke polîtîkayê asîmîlasyon û zextî yê vera şarê Dêrsimî serranê 1937-1938î de sey îmha ameyî kerdene û ame vatene ke Dêrsim 85 serrî yo keno ke darbanê xo bipêşo, vera înkarî xoverda dano, wazeno heqê xo yê hemwalatîya seyyewbîne bîfîno dest û mezalanê pîrikanê xo bîvîno.

Eşkerayîye de ame waştene ke wa arşîvî bêrê akerdene, cayê mezalanê Seyîd Riza û embazanê ci bêrê eşkerakerdene, lîsteyê domananê ke ameyî surgunkerdene û vînkerdene bêro eşkerakerdene, nameyê Dêrsimî bêro îadekerdene, wa dewlete dêrsimijan ra ozrê xo biwazo, ziwan û bawerîya dêrismijan bêro naskerdene, projeyê texrîbatî yê vera kultur û ekolojîyî bêrê betalkerdene û heqê hemwelatîya seyyewbîne bêro naskerdene.

Wekîlê HDPyî Musa Pîrogluyî zî bale ante hêrişê vera Dêrsimî ser û vat: ''Senî ke Dêrsim de ame kerdene ewro zî çekê kîmyewîyî yenê şuxulnayene û qirkerdişê pîlî yenê kerdene. Roje roja vervejîyayîşê nê sîyasetî gonî ya. Ma senî ke Kerbale û Dêrsim de çok nêda, ma do ewro  zî vera zextan çok medê. Ma do wayîrê tarîx, bawerî û kulturê xo vejîyê û înan payra tepişê.''