Komeleya Huqûqnasan ê Hemdeman (ÇHD) bi eşkerayîya nuştekîye da eşnawitene ke Zîndanê Silivri yê Îstanbulî de hêzê dewlete xo sey avûkatan danê naskerdene û zor danê tepişteyanê sîyasîyan ke wa îfade bidê. Avûkatanê ÇHDyî ra Merale Hanbayata ke tepişteyanê ke pê zorî  ame waştene ke îfadeyê înan bêro girewtene de pêvînayîş kerd ANFyî rê qisey kerd.

Hanbayate vat: ''Tepişteyan ma hayîdar kerdî ke hêzê dewlete xo sey avûkatan danê naskerdene û pê zorî îfadeyê înan genê. Naye ser o ma sey avûkatan 4ê kanûne de 5 tepişteyê ke ameyî tehdîtkerdene dir pêvînayîş kerd. Înan vat gardîyanan ê xapînayî û vat 'avûkatê şima ameyî' la  gama ke tepişteyî yenê berdene cayê pêvînayîşê avûkatan vînenê ke nê kesî  avûkat nîyê, kesê ke înan prosesê nezaretî de asayîş û cendirme de dîyî ê yê û wazenê cade peyser şirê. Tepişteyan ra yewî vat hela ke ey waşt kabînê pêvînayîşî ra vejîyo memurê înfaz pawitişî ber qefilnayo. Tepişteyan ra pê zorî îmzayî yenê girewene û yenê tehdîtkerdene. Vanê 'eke ti derheqê kesanê bînan de zanayîş bidê ti cade yenî veradayene, eke ti îfade medî tewr tay 10 serrî tîya de yê.' Di hewte cuwa ver hîrê kesan bi nê tewirê bêusulî îfade dayo û pîşmanîye ra vera dîyayî û rîyê îfadeyê înan ra yewna operasyon dîyayo destpêkedene.''

Hanbayate no caardiş sey îşkence û muameleyê xirabî hesibna û vat: ''Psîkolîjîya tepişteyan xeripîyaya. Hinî ne wazenê vejîyê pêvînayîşê avûkatan ne zî revîr.  Ma nêzanê hayîya dozgerî pê esta ya çîn a la bê destûrê îradeyê zîndanî no mumkun nîyo. Pê şuxulnayîşê avûkatîye îradeyê merdiman seqet kenê. No îşkence yo, sûc o. Zîndanan de asayîşo huqûqî çîn o. Hem tepişteyan hem zî avûkatan derheqê babete pêhesnayîşê sûcî kerdo. Ganî Mudirîya Pêroyî ya Ceza û Keyeyê Tewqîfî mudaxaleyê mesele bikero.''