Partîya Demokratîke ya Kurdîstanî PDK peyê îtîfaqê AKP-MHPyî de waştişê dewleta tirke ser o mîyanê planan de ca gêno û derban dano destkewteyanê kurdan ro. PDK Efrînî ra heta Bradostî, Behdînanî ra heta Rojawanî û Zînî Werte ra heta Mexmûrî bi waştişê dewleta tirke destkewteyanê kurdan ser o bazarîyan keno. Nika zî Şingal de hema bazarîye kewte dewre.

PDK û Hukmatê Iraqî 9ê teşrîna verêne ya 2020î de Şingalî ser o peymanêke kerde. Peymana ke îradeyê êzidîyan binpay kena, hetê êzidîyan ra sey 'rotişê Şingal û êzidîyan' û 'dewamê fermanî' ameye pênase kerdene.

PDKyo ke vera PKKyî dewleta tirke û hêzanê bînan reyde bazarîye keno, paştî dano hêrişanê vera PKKyî. Na babete de îşxalê Efrînî îsbatêko pîl o.

Îşxalê Efrînî de rolê PDKyî

Wexto ke dewleta tirke 20ê çeleyê 2018î de Efrîn îşxal kerd baskê Rojawanî yê PDKyî ENKSî 6 taburanê xo reyde îşxal de cagirewt. Xemê PDKyî nêbi ke nê komanê hêrişkeran wextê îşxalî de alaya rengîne xebitnaye.

Bazarîya PDKyî ya seba Biradostî

Serra 2019î de PDKyî sînorê Rûbarokî û Şemzînanî ra heta herêmanê Mêrgesor, Soran û Çomanî yê Başûrî herêmêka hîra teslîmê dewleta tirke kerde. Bi nê hawayî verê hêrişanê vera Xinêrî ame akerdene.

Îşxalê Serêkanîyê û Girê Sipî de rolê dewleta tirke

PDKyî îşxalê dewleta tirke yê vera Serêkanîyê û Girê Sipî de hêrişê dewleta tirke kerdî 'meşrû.' Serekwezîrê ê çaxî yê Başûrî Nêçirvan Barzanîyî 5ê teşrîna peyêne de Hewlêr de konferansêk de wina vat: ''Yew meseleya dewlete tirke pê kurdan çin a. Meseleya aye pê PKKyî esta. Ma wazenê wa kurdî xo PKKyî ra dûr bigêrê.''

Ambargoyê vera Mexmûrî

17ê temmuza 2019î de îdarekarê MÎTî yê Başûrê Kurdîstanî Osman Kose Hewlêr de kişîya dima PDKyî hêrişê xo kerdî giranêr. PDKyî vera Mexmûrî ambargo ard xa û ambargo hema zî dewam keno. PDK hêrişanê dewleta tirke yê vera kampe meşrû keno. 16ê nîsana 2020î de hêrişê dewleta tirke yê vera Mexmûrî ra dima Serekê Herêma Kurdîstanî Nêçirvan Barzanîyî vat: ''Kampa Mexmûrî seba karanê leşkerîyan yena xebitnayene.''

Gama PDKyî ya Zînî Wertê

PDKyî nîsana 2020î de Zînî Wertê de ke binê îdareyê YNKyî de ya, pêşmergeyê xo ca kerdî û xîret kerd ke herêma Raperîn û Soranî yewbînan ra cîya bikero ke îşxalê dewleta tirke wa asan bo. Dima ke PDK şi herême hêrişê tayarayanê şerî yê dewleta tirke de 3 gerîlayê HPGyî şehîd bîyî. Vera nêrazîbîyayîşanê rayaumûmîye PDKyî îdîa kerd ke ê çarçewa tedbîranê vera Korona de herême de ca bîyî û gama xo ra anêgêra.

Heftanîn de rolê PDKyî

Seba awankerdişê bingeyê îşxalî PDKyî heta Cengê Heftanînî dewam kerd. PDKyo ke vera bombardumananê dewleta tirke bêveng maneno, tay hêzê xo binê nameyê pawitoxanê sînorî de Heftanîn de ca kerdî û xîret kerd ke îşxal asan bikero. Bi heman hawayî mabênê Zaxo û Behdînanî de dewleta tirke baregehî akerdî.

Tewirê vera xoverdayîşê Şeladizê û Bamernî

Şarê Behdînanî bi taybetî roniştoxanê Bamernî û Şeladizê vera îşxalî tewirê xo mojna û ê bîyî hedefê dewleta tirke. 20ê hezîrane de hêrişanê hewayî yê dewleta tirke de 5 ciwanê Şêladizê ameyî qetilkerdene. Înan ra tay ciwanî serra 2019î de vera baregehanê dewleta tirke herême de rayîrî ra şîyî. Keyeyan eşkera kerd ke domanê înan bi îstîxbaratê PDKyî ameyî qetilkerdene.

Gama vera Şingalî

Dima ke terefgîrê Amerîka Mustafa Kazimî bi îqtîdar û terefgîrê PDKyî Fûad Hisên bi Wezîrê Karanê Teberî hêverî ê vera Şingalî têgêrayî. Hetkarê Wezîrê Rojhelatê Nêzdî ra Berpirsîyar ê DYA Joey Hoodî menga tebaxe de brîfîngêk da û Hewlêr, Bexdad û Anqara ra waşt ke 'binê şêwirmendîya DYA de' pîya bixebitê. 

Netîce de PDK û Hukmatê Iraqî 9ê teşrîna verêne de binê çimdarîya Temsîlkara Taybete ya Iraqî ya Neteweyanê Yewbîyayeyan Jeannîne Hennîs-Plasschaert de Şingalî ser o peymanêke îmza kerde. Peymane de ke îradeyê êzidîyan nêame hesibnayene, ame parekerdene ke babetanê asayîş, îdarî û newe ra awankerdişî de ame pêkerdene.

Komployê vera êzidîyan

Wexto ke merdimî bale xo bidê detayanê peymane ser babetê sey 'Pêşmergeyî do anêgêrê Şingal', 'Qeymeqamê PDKyî do wezîfe bikero' û 'Serdestîya verêne ya PDKyî do dewam nêkera' vejîyenê werte. Madeyêka peymane de yeno vatene ke 'Şingal û dormeyê ci de peynîya estbîyayîşê PKKyî û hêzanê bînan do bêra ardene, destûr do nêro dayene ke hêzê pabesteyê PKKyî rolêk bigêrê xo milî.' Naye ra yeno famkerdene ke PDK agêrayîşê Şingalî ra zêdêr wazeno ke derbêk bido PKKyî ro.

Peymane de nameyê PKKyî yeno reşkerdene û vera rêxistinîya êzidîyan hêrişî yenê kerdene. Hêzanê HPGyî nîsana 2018î de bi hawayêkê fermîyî xo apey antbi.

Nê pêkerdişê PDKyî ra dima yeno vatene ke PDK derheqê Kerkûk, Germîyan û herêmanê bînan de zî bazarîyanê winasênan do bikero.

Hedefo bîn Rojawan o

Nê gamê PDKyî heman wextî de Rojawanî rê zî gef wanenê. Çunke PDK sînorê Rojawan û Başûrî ser o qeraqolan virazeno, xendekan keneno û hêzanê xo tede keno ca.

Sey wextê referandumî gamê xeletî

PDK bi nê gamanê xo hesab keno ke hêzê herêmî û mîyanneteweyîyî do verê  ci abikerê. Labelê senî ke PDKyî referandumê xoserîye yê 2017î de şaşîye kerde, bi nê hawayî hema zî heman şaşîye keno.

Hêzanê ke nika PDK mutefîqê înan o, referandumê 2017î de vera kurdan tankê xo berdîbi sînorî ser. Peynî de zî rîyê hesaban ê şaşan ê PDKyî ra nêmeyê Başûrî destî ra şibi. 

Şarê Kurdîstanî de sebr nêmend

Nê gamê PDKyî hetê kurdan ra 'hesabê şaşî' ra zêdêr sey 'bazarî û xayînîye' yenê dîyene. Coka nêrazîbîyayîşî zî benê pîlêr. Yeno meraqkerdene ke PDK do nê hêrsbîyayîş û nêrazîbîyayîşan senî vindarno.