Siyasetmedar û dîplomatê avusturyayîjan dîyar kerd ke seba çareserîya meseleya kurdan firsendêk virazîyo û ganî Rayber Apo cade vera bidîyo û dewleta tirke seba haştîye game bierza.

Serekkomarê Avusturya yê verênî Heinz Fischerî vat: ‘’Bi vengdayîşê Abdullah Ocalanî seba çareserîya meseleya kurdan firsendêko tarîxî virazîyayo. Hinî ganî hukmatê kurdan seba çareserîye game bierzo. Ocalanî gamêka cesûre eşte û venga PKKyî da ke çekan war verdo. Prosesê haştîye tena bi gamanê yew hetî nêbeno. Ganî di hetî zî gaman bierzê. Eke no firsen nêro şuxilnayene do nêbo. Ganî wird terefî zî na mesele bi gamanê xo bi hawayêkê mendeyî çareser bikerê.’’

Wekîla Partîya Keskan a Viyana Heidi Sequenz vat: ‘’Birêz Ocalanî seba haştîye gamêka cesûre eşte. Ganî Tirkîya cewab bida ney. Heyf ke heta nika Tirkîya gamêka cidîye nêeşte. Eke hêrişê vera kurdan dewam bikerê no proses do bin bikewo. Ganî dewletê Yewîya Ewropa zî nê vengdayîşî bieşnawê û bîyarê ca. Her çî ra ver ganî Abdullah ocalan azad bibo.’’

Avûkat Clemens Lahnerî vat: ‘’Abdullah Ocalanî seba çareserîyêka mende zerrî ra veng da. Ey înîsîyatîfêko girîng girewto xo milî. Şerî bi serran dewam kerd la artêşa tirke ser nêkewte. Ganî hinî seba çareserîye game bierzîya.’’

Sîyasetmedare Ewa Ernst-Dziedzic vat: ‘’Abdullah Ocalan samîmî yo la dewleta tirke bi samîmîyetî nêzdîyê prosesî nêbena. Tirkîya hema zî tedaya kurdan û muxalefetî kena. Merdimî tepişîyenê.’’

Wekîla Partîya Keskan a Avusturya Bêrîvane Aslan vat: ‘’Ganî komelo mîyanneteweyî prosesî teqîb bikero. Şarê kurdî heqanê xo yê bingeyînan wazenê. Seba ke no proses ser bikewo ganî aktorê mîyanneteweyîy zî têbigêrê. Sey sîyasetmedaran ma amade yê ke mesuldarîyanê xo bîyarê ca. Şarê kurdî têkoşîn kerd, bedelî dayî.’’