Hemvervatoxê Kongreya Demokeratîke ya Şaran (HDK) Cengîz Çîçek, Hemserekê  Pêroyî yê Partîya Herêman ê Demokratîkan (DBP) Keskîn Bayindir û Wekîla Partîya Demokratîke ya Şaran (HDP) ya Mêrdînî Pero Dundar zî tede heyetêk bi wesîleya serrgêra komployê mîyanneteweyî yê Rayberê Şarê Kurdî Abdullah Ocalanî Buroyê Huqûqî yê Asrinî zîyaret kerd. Avûkatanê Abdullah Ocalanî Emran Emekçî, Razîye Ozturk û Rêzan Sarica heyetî verwazî kerd.

Keskîn Bayindirî ke tîya qisey kerd vist vîrî ke komployo ke 23 serrî xo dima verdayî û tecrîd hema zî dewam kenê. Bayindirî bale ante ser ke Abdullah Ocalan eşkeno heme problemnê Rojhilatê Mîyanênî çareser bikero û  qala têkoşînê vera tecrîdî kerd. Bayindirî vat: ''Şarê kurdî pê nê têkoşînî azadîya Birêz Ocalanî keno hedefê xo. Ma sey hêzanê ke paştî danê nê prosesî û danî domnayene ewro tîya de yê. Têkoşîno ke şima hetê huqûqî ra danê ma zî sey sîyasî û komelkî do bidê domnayene.''  Bayindirî munaqeşeyê ke rojanê peyênan de derheqê meseleya kurdî de yenê kerdene  nîşan dayî û vat: ''Sey têgêrayîşê sîyasetê kurdan na mesele de muneqeşeyê ma çîn ê.  Ne çirey ma çîyo winayên qisey kerd ne zî nika wina yew rojdemê ma esto. Babeta çareserîya meseleya kurdî de muxatab birêz Ocalan o.''

Avûkat Rêzan Saricayî zî komplo şermezar kerd û vat: ''Pê tecrîdê giranî yeno waştene ke Abdullah Ocalan şarê kurdî ra bêro raqilnayene. Şima pê nê zîyaretî ramojna ke Birêz Ocalan nîno vîrakerdene û do çirey têna nêro verdayene. Birêz Ocalan û şarî kurdî û şarê dinya bi hîsanê xurtan yewbînan rê pabesteyê ke do çirey merê raqilnayene. Têna bi azadîya Birêz Ocalanî meseleya kurdî eşkana bêro çareserkerdene.  Semedê çareserîya huqûqî û merdimî sîyaset ganî wayîrê Birêz Ocalanî vejîyo.''