Semedê protestokerdişê Komployê 9ê Teşrîna Verêne û tecrîdê serê Rayberê Şarê Kurdî Abdullah Ocalanî, bajarê Strasbourgî yê Fransa de verê Konseya Ewropa de vizêr çalakîya roniştişî ya çar rojan dîyaye destpêkerdene.

Roja diyîne ya çalakîye de nobete hetê Federasyonê Komelê Demokratîkî yê Kurdistanijan û Federasyonanê Şaranê Kurdîstanî, temsîlkaranê Têgêrayîşê Cinîyan ê Almanyaya Başûre û hunermendî Hozan Dîyar û Denîze Deman ra ameye dewrgirewtene.

Endamê KNKyî sîyasetmedar Tahîr Koçerî ke çalakîye de qisey kerd veng da dezgehanê eleqedaran ê Ewropa ke wa wezîfeyê xo bîyarê ca.

Helene Dersima ke bi nameyê TJK-E qisey kerd bale ante serê komplo û tecrîdê vera Abdullah Ocalanî ser û vat her çiqas hêzê mîyanntewteyîyî qirkerdişan zafêr bikerî, têkoşînê kurdan zî çend şino girdêr beno.

Wekîla HDPyî Feleknas Uca zî vat: ''Abdullah Ocalan binê tecrîdê giranî de yo û hetê bînî ra zîndanan de zextî her roje zêdîyenê. Dewletê Konseya Ewropa û CPT berpirsîyar ê û ganî bêveng memanê.''

Dima ra ver bi CPyî rayraşîyayîşêk ame kerdene û bi sloganan azadîya Abdullah Ocalanî ameye waştene.

Çalakîye siba do hetê temsîlkaranê PYD, PJAK, CÎK, FEDA û hunermendanê TEV-ÇANDî ra bêro dewrgirewtene. Heyet do CPT reyde pêvînayîş bikero. Roja pancşeme zî do çalakîyêka xurte bêro kerdene. Yeno pawitene ke Belçîka, Luksemburg, Fransa û Hollanda ra têgêrayîşê ciwanan tewrê çalakîye bibê.