Çalakîya roniştişî ya verê Konseya Ewropa  ya ke bi vengdayîşê KCDK-E seba çar rojan dîyayebî destpêkerdene, pê eşkerayîya çapemenîye ya parlamenteranê Konseya Ewropa qedîayaye.

Parlamenterê Ewropa û avûkatê Abdullah Ocalanî zî tede xeylêk îdarekarê dezgehanê kurdan û komelê sîvîlî tewrê çalakîye bîyî. Parlamenter Paul Gavano îrlandayijî ard ziwan ke û semedê paştdayîşî tewrê çalakîye bîyo û vat: ''Rejîmê Tirkîya heqanê merdiman û demokrasî nas nêkena. Têkoşînê şima her ca ra yeno eşnawitene. Ma sey Sinn Feinî paştî danê şima.''

Reyna Kibris ra Parlamenter Konstantinos Efstathiou, Irlandara Parlementer Thomas Pringle û Katalonya ra Parlamentere Laura Castel i Ford zî polîtîkaya hêrişkare ya Tirkîya û bêvengîya Ewropa şermezar kerd û vat ganî Abdullah Ocalan cade bibo azad.

Avûkata Abdullah Ocalanî  Barbara Spinelli zî vat: ''Ez Yewîya Avûkatanê Demokratîkan a Ewropa ra yena. Ma semedê pêvînayîşê Ocalanî sey avûkatanê ci muracatê dewleta tirke kerd. Ma wazenê rewşa Ocalanî û Îmraliyî bivînê. Bitaybetî hîrê serrî yo tecrîd zaf bîyo xorî. 750 avûkatan eşkerayîya hempare îmza kerde. Ganî CPT wezîfeyê xo bikero. Ma sey avûkatan do pêrodayîşê xo rê dewam bikerê. Heqê hêvî hewn nîyo, yew heqê merdiman o ke ganî bêro caardene.''

Reyna bi nameyê dezgehanê kurdan zî qiseykerdişî ameyî kerdene, bale ameye antene muhîmîya rolê Abdullah Ocalanî ser û mesajê pîlkerdişê têkoşînî ameyî dayene.