Zîndanê Amedî ra 7 tepişteyî 20ê teşrîna verêne de surgunê Zîndanê Antalya, Zîndanê Tokatî, Zîndanê Konya, Zîndanê Kayserî, Zîndanê Bunyanî û Zîndanê Ereglî yê Konya ameybî kerdene. Tepişte Mehmet Işiktaş zî nînan ra yew o.

Babîyê Işiktaşî Eyup Işiktaşî pê rayîrê telefonî lajê xo reyde qisey kerd û lajê ci qala binpaykerdişanê heqanê tepişteyan kerde.

Işiktaşî pare kerd ke wextê surgunî de destûr nêdîya ke kincanê xo ra ber çîyêk bero, 14 rojan karantîna de mendo û ci rê ame ferzkerdene ke mîyanê tepişteyanê edlîyan de bimano. Semedo ke Işiktaş no qebul nêkerde hucreyê yewkesî de ame cakerdene.

Işiktaşî babîyê xo rê vat: ''Fikrê ma cîya yê, nêbeno ke ma heman cayî de bimanê. Eke îdareyê zîndanî waştişê mi nêro ca û mi nêbero cayê embazan ez do dest pê grevê vêşanîye bikera.''

Babî Işiktaşî da zanayene ke 6ê teşrîna peyêne de lajê ci dest pê grevê vêşanîye kerdo.

Şaban Kaygusuz (24)o ke  destêk û lingêka ci çin ê û raporê ci yê 'se ra 90 astengdar o' esto Zîndanê Amedî ra surgunê Zîndanê Bunyanî amebi kerdene. Dîya zanayene ke Kaygusuzî rê hûmaritişo payanser û cigêrayîşo rût ameyî ferzkerdene. Ame parekerdene ke raporê derbe ra dima zî Kaygusuz nêameyo berdene bi revîrî.