Artêşa tirke ya îşxalkere Herêmanê Pawitişî yê Medya vera gerîlayan çekanê kîmyewîyan şuxulnena. Bajaranê Zurih, Luzern û Cenevre yê Swîsre de vizêr kurdî û dostê înan vejîyayî kuçeyan dewleta tirke şermezar kerd û veng da dezgehanê mîyyanneteweyî yê eleqedaran ke wa vengê xo vejê.

Zurih de bi vengdayîşê Merkezê Komelê Demokratîkî yê Kurdan û Meclîsê Cinîyan ê Bêrîtane çalakîyêke ameye kerdene. Çalakwananê ke pê fotografanê gerîlayanê ke şehîd bîyî pankartan bale ante hêrişê dewleta tirke ser veng da Rêxistina Qedexekerdişê Çekan ê Kîmyewîyan (OPCW) wa şirê Tirkîya ser ke çekanê kîmyewîyan meşuxulno.

Badê çalakîye heyetêkî dezgehê GSoA yo ke vera çekanê kîmyewîyan gurîyêno dir pêvînayîş kerd. Pêvînayîş de qerar ame girewtene ke heyetêk do herême de cigêrayîş bikero û vera şuxlnayîşê çekanê kîmyewîyan do kampanyayêke bêro destpêkerdene.

Luzern de zî vera şuxulnayîşê çekanê kîmyewîyan kurdî meydanan de bî. Çalakîye de ame vatene ke verê çimanê heme dinya dewleta tirke sûcê şerî kena û pê çekanê kîmyewîyan hêrişê gerîlayan kena û veng dîya dezgehanê mîyanneteweyî ke wa perpirsîyarîya xo bîyarê ca.

Cenevre de zî kurdan û temsîlkaranê partîyanê sîyasîyan ê Swîsre bi rayraşîyayîşêkî hêrişê dewleta tirke yê vera Kurdîstanî û şuxulnayîşê çekanê kîmyewîyan şermezar kerd. Dima ra mîtîngêk ame kerdene û wekîlanê Swîsre Stefaniw Prezioso û Jean Batou ard ziwan ke şuxulnayîşê çekanê kîmyewîyan nîno qebulkerdene û ê do nê bifînê rojdemê welatê xo.

Adresê çalakîyanê ewro zî wina yo:

Solothurn-Kreuzackerplatz, Saete: 14.00

St Gallen- Kornhausplatz, Saete:15.00

Basel-Verê Bahnhof SBByî, Saete: 15.00