Endama OHDyî Avûkate Elîfe Taşdogen derheqê xîretanê avûkatan ê serê tecrîdê Îmraliyî û tewirê dewleta tirke de ANFyî rê qisey kerd.

Elîfe Taşdogen pare kerd ke 22 welatan ra 350 avûkat û Tirkîya ra zî 775 avûkatan seba pêvînayîşê Rayberê Şarê Kurdî Abdullah Ocalanî, Omer Hayrî Konar, Hamîlî Yildirim û Veysî Aktaşî muracatê Wezîrîya Edaletî kerdbi û waştbi ke pêvînayîşê avûkatan û keyeyan bêrê kerdene.

Taşdogene da zanayene ke 19 mengî yo Rayberê Şarê Kurdî ra xeberêke nêna girewtene û vat: ''Avûkatanê Buroyê Huqûqî yê Asrinî çend reyî muracat kerd. Ma zî avûkatanê Tirkîya û dinya reyde muracat kerd. Heta nika cewab nêdîya muracatan. Reyna cezaya dîsîplînî bîye bahane û qedexeyê pêvînayîşî yê 6 mengan dîyayo avûkatan. La derheqê cezayan de agahîye zî nêna dayene avûkatan.  Îmrali de qanûnî bi temamî yenê binpaykerdene. Eke şima (Tirkîya) terefgîrê peyman û qanûnanê mîyanneteweyîyan ê nêeşkenê bi hawayêkê keyfî nînan binpay bikerê. Îmrali de zî tepişteyî est ê û heqê înan ê tepiştetîye est ê.''

Taşdogene ard ziwan ke rixmê muracatn zî qanûnê 5275î yê Qanûnê Bingeyî seba Ocalanî nêno caardene û vat: ''Tirkîya bi kerdişanê xo yê Îmraliyî, bi binpaykerdişê qanûnanê xo û peygoşîya peymananê mîyanneteweyîyan sûc kena. Dezgehê heqan, CPT û mekanîzmayê bînî de nê warî de bêveng ê û nêwazenê rewşe bivînê.''

Taşdogene bale ante zîyaretê CPTyî ser û vat: ''Rêxistina Vergirewtişê Îşkenceyî (CPT) 8 reyî Îmrali zîyaret kerdo. CPTyî pêro raporanê xo yê ke weşanîyayê de vato ke Îmrali de rewşa îşkence û tecrîdê giranî est a û ganî şertê zîndanî bêrê holkerdene. Îmrali de vera tepişteyan îşkence û tecrîdêko giran est o, Tirkîya zî sûcdara ney a. Ganî selahîyetdarê huqûqê mîyanneteweyî mesuldarîyanê xo yê sîyasîyan, komelkî û huqûqîyan bikerê. Ganî cade têbigêrê ke Birêz Ocalan û tepişteyê bînî keye û avûkatanê xo bivînê.''