Roniştişo 4. yê dewaya çawisê pisorî yê tecawuzkerî Musa Orhanî Mehkemeya Cezaya Girane ya Sêrtî de ame kerdene.

Keyeyê Îpeke Er, avûkatê ci, Baroyê Sêrtî, Baroyê Amedî, Komeleya Huqûqnasanê Seba Azadîye (OHD), Komeleya Heqanê Merdiman (ÎHD), Vervatoxa Meclîsê Cinîyan ê HDPyî û Wekîla HDPyî Ayşe Acar Başaran û Hemşaredara Êlihî Songule Korkmaza ke herinda ci de qeyûm amebi tayînkerdene tewrê roniştişî bi.

Dormeyê edlîye û zereyê ci de tedbîrê zêdêrî ameyî girewtene û destûr nêdîya ke rojnamegerî debikewê zereyê edlîye. Dewa pê pawitişê dozgeran dest pêkerde.

Dima dozgerî murala red kerd û waşt Musa Orhan bêro tepiştene û cezakerdene. Labelê heyetê mehkeme pawitişê avûkatan ra dima bira xo eşkera kerde û bire daye ke Orhan bi hawayêkê netepişteyî bêro muhakemekerdene.