Welatanê Ewropa de çalakîyê vera tecrîdê serê Rayberê Şarê Kurdî Abdullah Ocalanî û hêrişê îşxalî yê dewleta tirke yê vera Kurdîstanî û şuxulnayîşê çekanê kîmyewîyan dewam kenê.

Paytextê Fransa Paris de ciwanan bi waştişê azadîya Abdullah Ocalanî çalakîya qefilnayîşê rayîrî kerde. Ciwanan Villiers Le Bel de rayîr qefilna û bale ante sîstemê Îmraliyî ser.

Bajarê Marsilya yê Fransa de ciwananê kurdan û enternasyonalîstan bi çalakîyêke xoverdayîşê gerîlayan selam kerd û bale ante polîtîkaya qirkere ya dewleta tirke ser. Ciwanan çarçewa Hemleya ''Werin Cenga Azadiyê'' de pirdêkî ser o pankartê ''Wa biciwîyo xoverdayîşê gerîlayan'' aliqnaye û derheqê şuxulnayîşê çekanê kîmyewîyan de vilawekî vila kerdî.

Bajarê Lozanî yê Swîse de zî çarçewa eynî hemle de standêk ame kerdene û bale ameye antene tecrîdê Îmrayî ser. Çalakîya ke serkêşîya ciwanan ê kurdan de ameye kerdene de kitabê Abdullah Ocalanî dîyayî naskerdene û derheqê xoverdayîş û rewşa ci vilawekî ameyî vilakerdene.

Paytextê Avusturya Vîyane de zî semedê nasdayîşê fîkranê Abdullah Ocalanî stand ame akerdene. Ciwanan azadîya Ocalanî sey azadîya heme cinîyan, şarê kurd û xoza name kerde û vat ê do heta serkewtişî çalakîyanê xo rê dewam bikerê. Ciwanan semedê tewrbîyayîşê çalakîya ke do 26ê teşrîna peyêne de Troststrasse de bêro kerdene zî veng da.