Hemvervatoxê Komîsyonê Têkilîyanê Teberî yê HDPyî Hîşyar Ozsoyî derheqê tesîrê serkewtişê Bidenî yê serê Tirkîya û vengdayîşanê Parlamentoya Ewropa yê vera Tirkîya de ANFyî rê qisey kerd.

Ozsoyî vat: ''Biden hêverî do têkilîyanê bi NATOyî xurtêr bikero coka lîderanê Yewîya Ewropa reyde zî do pêvînayîşan bikero. Erdoganî wextê Trumpî de xîret kerdêne ke nakokîyanê mabênê Amerîka û Yewîya Ewropa ra îstîfade bikero.Biden do verê nê nakokîyan bigêro û no zî yeno manaya ke tedaya vera Tirkîya do biba giranêr. Ewropa de zî ambargoyê vera Tirkîya ser o nîqaşî estê.''

Ozsoyî da zanayene ke rojdemo tewr girîng ê Amerîka-Tirkîya meseleya S-400an a û vat: ''Meseleyê Halkbank, Sûrîye, S-400an seba Amerîka girîng ê. Amerîka vera ê welatanê ke Rûsya ra malzemeyê şerî hêrînayî ambargo kerdêne. Trumpî no ambargo şikna. La Biden do na mesele reyna bîyaro rojdem.''

Ozsoyî ard ziwan ke ganî rayaumûmîya kurdan Bidenî ra zaf çîyan nêpawa û vat: ''Seba ke Trump zaf xirab bi Biden ma rê hol aseno. Xora Bidenî Herêma Kurdîstanî reyde têkilîyê sempatîkî ronayî la polîtîkayanê teberî yê Amerîka de serekê Amerîka faktorêk nîyê. ''

Ozsoyîvist vîrî ke kombîyayîşê Konseya Yewîya Ewropa ya10-11ê kanûne de do amabargoyê vera Tirkîya bêrê nîqaşkerdene û vat: ''Erdogan seba ke verê nê ambargoyan bigêro bi vatişan xîret keno. Eke Tirkîya babetanê huqûq, demokrasî û heqanê merdiman de hînî tay gaman nêerza vera ci ambargoyê giranî do bêrê kerdene. Goreyê zanayîşanê ke resayî ma nîqaşan de yeno waştene ke gumrukê Tirkîya bêro vindartene. Eke hukmatê Erdoganî apey gamêke nêerzo o çax hem Ewropa hem zî Amerîka vera ci do têbigêrê.''