Wekîlê HDPyî yê Wanî Sezai Temelliyî derheqê Îtîfaqê Kede û Azadîye de ANFyî rê qisey kerd.

Sezai Temelliyî vat: ‘’Ma s  ey HDPyî xeylêk wext o ke seba ke welat tengayî ra vejîyo rayîrê hîrêyinî nişan danê. Semedê înşayê nê rayîrî û progremê têkoşînî ma gaman erzenê. Şaranê Tirkîya rê îtîfaqê Cumhur û Mîlletî yeno ferzkerdene. Ma mero vîrakerdene ke nê wirt îtîfaqî eke babetê kurdî bê qet ferqê înan çîn o. Semedê çareserkerdişê meseleya  kurdan programê înan çîn o. Xora eke na mesele çareser mekerê nêeşkenê demokrasîyî zî bîyarê Tirkîya. Eke çew çerçeweya hîra ra biewno, yeno vînayene ke Tirkîya senî hewceyê HDPyî ya. Îtîfaqê Kede û Azadîye her hetî ra eşkeno welatî tengayî ra bixelisno.’’

Temelliyî polîtîkaya hêrişkare ya îqtîdarî vist vîrî û vat: ‘’Ma vîjnayîşanê verênan ra zî zanê ke îqîtdar verê vîjnayîşan şaran keno cîya û verdeno yewbînan. Bitaybetî partîya ma HDPyî sey hedefî ramojeno. Dişmenîya vera kurdan û polîtîkayanê şerî sey çîyêkî normalî rayra beno. Ewro meseleya tewr pîle ya Tirkîya polîtîkaya şerî ya. Ganî Tirkîya nê polîtîkayan ra vejîyo. Hem Başûr hem zî Rojawan de qewimîyayîşî eşkera yenê vînayene. Ganî vera polîtîkayanê şerî muhalefeto xurt vejîyo werte. Coka wezîfeyê HDPyî  yo ke şarê kurdî, heme şaran û partîyê ke demokrasi û azadîye wazenê bîyaro têhet.’’

Sezai Temelliyî bale ante muhîmîya têkoşînê hemparî ser û vat: ‘’Ganî ma  verî faşîzmî birijê. Îtîfaqê Kede û Azadîye  îtîfaqê têkoşînê vera faşizmi yo. Ma sey îtîfaqanê bînan bazarîya vîjnayîşî nêkenê, ma semedê demokrasîyî têkoşîn kenê. Îqtîdaro ke warê sîyasetî de nêeşkeno HDPyî pê dewaya qefilnayîşî û dewaya Kobanê keno ke verê HDPyî bîgêro. Ma her hetî ra tedbîrê xo girwte ê se kenê wa bikerî do meeşkê HDPyî vindarnê.’’