Goreyê doneyanê Komîsyonê Huqûqî yê HDPyî 24ê hezîrana 2015î ra heta 25ê êlula 2020î 22 hezar û 321 HDPyîjî ameyî destbendkerdene. Têna di serranê peyênan de 3 hezar û 642 kesî ameyî tepiştene.

Goreyê raporê Komîsyonê Îdareyan ê Herêmîyan ê HDPyî zî HDPyî 65 şaredarî vistî destî nika destê ci de têna 6 şaredarî mendî. 48 şaredarîyanê HDPyî rê qeyûm ame tayînkerdene, 84 endamê Meclîsî, 9 endamê Meclîsê Pêroyî yê Şaristanî zî wezîfe ra ameyî dûrvistene. 37 hemşaredarî ameyî destbendkerdene û 18 hemşaredarî zî hema zî tepişte yê.

Wekîlê HDPyî yê Wanî Sezaî Temellîyî vat: ''Serra 2015î ra nata rejîmêk esto û hînî ma nameyê nê rejîmî eşkera kenê: faşîzm. Tepiştiş û destbendkerdişî bi Planê Rijnayîşî  û bi tehqîqatê Kobanê dewam kenê. No zî mojneno ke HDP mîyanê şaran de hêvî ya.

HDP bêguman vera nê kerdişan xo ver dano la ganî partîyê muxalefetî zî vera nê kerdişan bêveng nêmanê. No îqtîdar dewamê xo dişmenîya vera kurdan de vîneno. Ganî îqtîdar bizano ke HDP perspektîfê xo ser o yo. Operasyonê sîyasîyî do nêeşkê HDP vindarno.''