Tepişteyo sîyasî Bariş Keve (25)  hucreyê yewkesî yê Zîndanê Tîpê Tyî yê Akçadagê Meletî de  ame qetilkerdene.

Saetanê şawe de îdareyê zîndanî xebere daye keyeyê Bariş Keveyî yo ke Şaxê Wanî de ciwîyeno û îdîa kerd ke lajê înan xo kişto. Keyeyê Bariş Keve cade kewt rayîrê Meletî.

Birayê Keveyî Îlkan Keve vat înan tewr peynî de 16ê êlule roja îneyî pê telefonî Bariş Keveyî de qisey kerd û çîyêko xirab çînêbi.

Bariş Keveyo ke Edirne de ame destbekderdene û tepiştene cezaya 6 serran û 3 aşman dîyaye ci. Keveyo ke 5 aşmî yo Zîndanê Akçadagî yê Meletî de yo yew hewteyo rîyê ‘’cezaya dîsîplînî’’ ra hucreyê yewkesî de ameyêne tepiştene.