Keyeyanê tepişteyan Ramazan Turan û Selman Buyuktopî da zanayene ke wextê sewqî de wird tepişteyan rê zî cigêrayîşo rût û îşkence ame kerdene. Keyeyan muracatê ÎHDyî kerd.

Tepişteyî Ramazan Turan û Selman Buyuktop 4ê adare de Zîndanê Riha ra sewqê Zîndanê Çorumî ameyî kerdene. Tepişteyan keyeyanê xo rê qala îşkenceyî kerde.

Babîyê Ramazan Turanî Ekrem Turanî pare kerd ke lajê ci û 4 embazê ci yê bînî bi lezî ameyî surgunkerdene. Turanî vat: ''Tepişteyî bi şîdetî ameyî dekerdene wesayîrê rîngî. Destûr nêdîyayo ke eşyayanê xo zî bigêrê.Şîdet heta Çorumî dewam keno. Çorum de zî înan rê cigêrayîşo rût yeno kerdene.''

Babî Turanî ard ziwan ke 4 rojan ra dima înan xebera sewqî girewte û vat ke eke çîyêk bêro sereyê lajê ci îdareyê zîndanî ney ra mesuldar o. 

Babîyê Selman Buyuktopî Salîh Buyuktopî zî dîyar kerd  ke lajê ci rê 5 serrî verî cezaya zîndanî ya 17 serran dîyaya û lajê ci tim raştê îşkence û kerdişanê xiraban maneno. Babî Buyuktopî vat: ''Îşkenceyê Riha Çorum de zî dewam kerdo. Dekewtişê zîndanî de seba ke înan cigêrayîşo rût qebul nêkerdo gardîyanan pê solan pay nayo sereyê înan ser, kincê tepişteyan dirnayê û cezaya hucre daya înan. Ma 7 rojan lajê xo ra xeberêke nêgirewte. Keyeyê Ramazanî xebere daye ma.''